Verdreihte Tieden — wenn negativ positiv is

En lütt Familjenvertellen vun Meike Balzer-Fraun


En Nettbreef: "Oma, mir geht es schon besser, und ich bin negativ!" Dat freut mi düchtig, denn kann de Lüttje na de Harvstferien ja na School hen. He harr bloots en Snööv, sünst nix.
De Jungs sünd an't Testen intwüschen wennt as an't Tähnputzen.

Vun November bet Märzmaand geiht allens sien'n Gang: Krippenspeel ‚online'. Meist klappt dat ok in de School — tomindst keen ‚homeschooling' oder ‚Quarantäne'. ‚homeoffice' för uns Dochter is allerbest, also positiv.

Twee Weken in't Vörjohr:
In'n Märzmaand hett uns Swiegersöhn en Malöör bi'n Sport. He kann nich lopen un mutt opereert warrn. Üm dat in't Krankenhuus allens to besnacken, bruukt he en negativen Test. He schall den neegsten Dag opereert warrn un twee Nachten in't Krankenhuus blieven. Sien'n Test will keeneen nich sehn. Se maakt een nie'n Test un de is positiv. He hett en beten Halspien, man de Operatschoon mütt se een Dag verschuven, wieldat se keen Coronabett för em hefft. Dorför "dröff" he all na een Nacht wedder na Huus, wieldat he ja Corona hett. Is dat positiv?
Wat'n Glück, dat mien Mann em allerwegens fohren kann.

Togliek is de Lüttje en beten süük. Quiemelig, mööd, Snoddernees un Hosten. He blifft to Huus, ofschoonst sien Test negativ is.

Uns Dochter hett nu allens, wat to Corona so tohöört, as in't Lehrbook! De arme Deern is so wat vun klöterig. Positiv is blots, dat ehr Test negativ is, un dat se na twee Daag all wedder fix op de Been is. Man nu hett se en positiven Test. Dorüm scheert sik aver keeneen, se arbeidt ja in't ‚homeoffice'. Wo positiv!

Na een Week is de Lüttje wedder op'n Damm: 'n beten patzig un jümmers hungerig, as Kinner, de süük weren, so sünd. De Schooltasch un dat Botterbroot sünd praat, man nu is sien Test positiv, un he mutt bet to de Oosterferien in Quarantäne. Positiv is negativ.

De grote Jung leevt vergnöögt mang siene Familje, geiht na School, is mit sien Fohrrad ünnerwegens, em fehlt nix. He is negativ, un dat is positiv un keen April-Jux.

Mien Mann fohrt allens, wat nödig is, un ik kaak allens, wat lecker is. Wi maakt keen Test nich — beter is dat woll.


5.4.2022


na baven