"Name ist Schall und Rauch" — Recht harr he, de ole Goethe

vun Meike Balzer-Fraun

Siet 1856 gifft dat an de Werser in Mittelsbüren/Bremen-Grambke Dröög un Natt.
En Gröönlandfohrer hett dunnemals dat marode Parrhuus un de Fährgerechtigkeit köfft. Dat Huus hett de ole Imhoff op Chic bröcht un as Fährhuus un Kroog torecht maakt. Meist hefft sik dor woll Anglers un Törfschippers mit Grog opwarmt.
Mit ehr Roderbööd hefft de Imhoffs denn düchtig Geld verdeent, as 1885 de Lustfohrten mit Dampscheep twüschen Bremen un Bremerhoben in de Mood kemen.

Veel Lüüd wullen na dat schöne Mittelbüren hen. Nu geev dat dor aver bit 1913 keen Damperbrüch, so dat de Passageren mit Roderbööd an Land schippert worrn.
(‚Ausbooten, as vör Helgoland!'). Ut den Kroog woor en Weertshuus mit en smucken Sommergoorn.

Dat Flach an de Werser bi de Moorlose Kark weer un is jümmers noch een vun de schöönsten Bremer Plätz an'n Stroom. Hüüttodaags meist för Radfohrers un Wannerslüüd. Parkplätz för Autos gifft dat aver ok.

So schöön kann de Ünnerwerser ween!

Moorlose Kark. To den Naam steiht hier wat

In de langen Johren geev dat faken nie'e Besitters in dat "Gasthaus zur Moorlosen Kirche". Weertslüüd vun ünnerscheedlichste Klören: welk to düer, bi welk dögg dat nix oder weer överkandidelt. Op welk weer keen Verlaat nich — keemst hen, weer dicht. Ok mal Leddigstänn.

Mit nie'e Besitters is in'n Mai wedder mal ‚Land in Sicht' an der Werserkant:
"Goldy's Schmankerl Huus" heet dat nu.

Wees man nich bang! Du hest nich de "Qual der Wahl" mang Kaasnocken oder Bookwetenpannkoken, Stockfischgröstl oder Granat mit Röhrei. Keen Droom vun ‚Ferien in Tirol'. Keen Trüch nich an Oma ehren Kökendisch.
Dat gifft Pinsa!
Wat woll mehr Geld bringt? De ‚Schmankerln' oder dat ‚Huus'? För mi keen Fraag nich: In'n Harvst gifft't to de Tiet vun'n ‚Bremer Freimaak' veer Wekenennen lang Oktoberfest.

Pinsa is sowat as Pizza, bloots nich so hitt

To veel plattdüütsch Lokalpatriotismus? Köönt ji jüm vörstellen, dat dat jichtenswo in de Bargen en "Labskaus-Alm" oder en "Pannfisch-Stüberl" gifft?

Verstaht mi nich verkehrt: Jeedeen kann eten un verköpen, wat he will un wo he dat will. Man nimm mi dat för övel, nich ünner falsche Naams!