Druck bi dat Plattdütschke Theaoter

van Hildegard Tölke

Rundümtau in't Ollenborger Münsterland wedd bi us nu Plattdütschket Theaoter spält. Dei Korten sünd drocke utverköfft. Sönndaogs giff dat sogor Kaffee un Kauken dorbi. Dei Lüe willt nao dei Corona-Tied wat tau'n Lachen häbben. Un dat kanns du dor uck. Dei Theaoterspälers sünd wohre Originaole un Profis. Holls dien Buuk bi faste för Lachen.

Tau dei leßten Aobendvörstellung van dat Theaoterstück nimmp Paul sien 'n Naober Hannes mit. Hannes wull eierste gor nich. Aower hei gaiht doch mit. Achteran giff dat noch Beier inne Kneipe. Dei beiden sittet in dei vörlessten Riege van dat Theaoter. Sei luurt dorup, datt dat nu endlick losgaiht. Dat is müskenstill, kiener is an't Schrammhaußen. Dat Licht achter den Vörhang is all ute. Do sägg Hannes: "Du Paul, ick glöwe, ick mott noch äben nao dei Pere kieken. Well weit, wanneiher dei Spälers eine Pause maokt. Kanns mi jao vertellen, wenn ick wat versümt häbbe."

Hannes suust los. Hei häff mächtig Druck uppe Blaosen. In 'n Vörruum van den Saol is uck dei Lüchten ute. Hei kick un söch un finnt dei Döörn för dei Toilette nich. Wor is dei bloß? "Wor mott ick hen? Is wisse dichte bi'n Saol," denkt hei sick. Hannes is so uperägt un maokt dei eierste linke Dörn aopen. In dissen Ruum is dat uck zappenduuster. Dei Druck uppe Blaosen is bold nich mehr uttauholl'n. Do süht hei vör sick anne Siete näben ole Schateken ein 'n Emmer staohn. Un denkt in siene Notlaoge bi sick: "Sühtt jao kienein un kummp uck kienein! Dat Stück is wisse all anfungen. Ick kann't nich länger mehr utholl'n." Un so pinkelt hei mit Druck in un an'n Emmer.

Schlacke löpp hei trügge in'n Saol. Dat Theaoterstück is all anfungen. "Häbb ick wat verpasst?", fraogt hei Paul liese in't Ohr. "Nee," sägg do Paul. "Väl häs du noch nich versümt. Aower at dat Theaoterstück jüss anfungen was, do is anne linken Siete up dei halwdüstern Bühne jümmersein kaomen un häff wat in den Emmer gaoten. Aower so richtig seihn kunns dat van hierut nich, bloß hörn. Woso dat tau dat Theaoter hörn schull, vertaoh ick nich. Sünnerbor! Mangers häbbt dei Spälers jao 'ne neimäudske Idee in Koppe."

Aower dorup knüfft Hannes nich un gnaffelt schliepsterds vör sick daol.

Bild: Ludgerd Lüske. Klick up tau'n Vergröttern!

Wortverklorn Südollenborger Platt:

Naober = Nachbar; schrammhaußen = räuspern; nao dei Pere kieken = sagte man früher zu: Toilette aufsuchen; versümen = versäumen; Lüchten = Beleuchtung; zappenduster = stockfinster; Emmer = Eimer; Schateken = alte Sachen, Trödel