Das Passwort bitte!
Sünst köönt Ji de Geschicht nich lesen

vun Silke Frakstein


"Die Fahrausweise bitte!" — dat weer in mien Kinnertiet. "Das Kennwort bitte!" — dat is de hüütige Tiet. So bilütten geiht mi dat op'n Senkel.

Wir harrn in unsen Urlaub, obends an'n Kamin, scheune Kissen to'n Kuscheln. De harrn vun binnen so'n Ort Licht.

Wi kunnen keen Henwies to de Firma finnen. Ober dat Hotel geev uns de Adress.
Ik, ran an den Computer un bi de Firma no den Artikel froogt.
Antwort: Twee Sieden mit Henwies un Tüdelüt un de Artikelnummer.
De Nummer blinkt, un as ik de anklick, keem de Text: "Wir benötigen Ihr Kennwort, Anschrift, Telefonnummer..."
Ik söch de Kissen nu annerswo.

Wo stüert wi eegentlich op to?! Orrer beter seggt: Wo geiht dat hen?
Wi goht nich mehr in de Lodens, de Paketboten suust dörch de Gegend un nüms is to Huus. Un de Poppiertünnen löppt över.
Un wenn du würklich mol enen Minschen an't Telefon hest un grod dien Anliegen vördregen wullt, kümmt de Froog no dat Kennwort.

Eegentlich bruukt de Minsch Licht, Luft un Sünnschien. Ober nee: Ene App un dat Kennwort, sünst büst du Luft. En groten, bekannten Loden will ok noch de Email-Adress. Ik find dat gräsig. Un veele, veele annere ok.
Ober — se mookt dat mit. "Tja, was sollen wir denn machen?", froogt se. — Eenfach nix!

Hier in Neendörp to'n Bispill kümmt mit dat Wekenblatt ok de Werbung. Un dat warrt jeedeen Week mehr. — Markst Müüs? De Lüüd wüllt dat swatt op Witt un mit den Zettel rin den Loden. Af un an gifft dat lütte Rabattmarken twüschen 5 und 10 Perzent. De kümmt op den Artikel an de Kass, gescannt, un fardig.

Veele Lüüd meckert jo ok över de Lüüd, de noch mit Bargeld betohlt!! Duert to lang, klaagt se. Un wat is mit de Handy-App? Dat Handy warrt erst an de Kass ut Jack orrer Büx rutfummelt. Denn stimmt dat Kennwort nich — nochmol... De Deern an de Kass warrt nervös, de Lüüd achtern verdreiht de Ogen.

Wat is dorgegen de Ool Fro mit € 24,97? Oma hett de Knieptasch al in Hand. "Nehmen Sie raus, was Sie brauchen!", seggt Oma. Zack, erledigt. De App bruukt se nich. Se köfft dat, wat se bruukt, un nich dat, wat de App so an Vörslääg hett.

De Hoffnung starvt toletzt.

 

 

So, un hier dat Passwort, dormit Se de Geschicht lesen köönt: *********

 


2.2.2025


na baven