Party inne Dönsk:
Dei Vörläsparty

vun Behrend Böckmann

Wecker nich gaut läsen kann,
schlütt sik 'n Vörläs-Party an.
Vörläs-Partys sünd in 'n Trend,
so as man Tupper-Partys kennt.

Dorvon hett Größing Trude hürt,
harr sik all mihrfach doran stürt,
tuddert vör sik hen in'n Stillen,
dat Kinner nich mihr läsen willen.

För Niegelich 'n Läsparty,
mit Schnasselie so näbenbi,
inne Dönsk an'n Disch, den runnen,
hemm' sik Tauhürers infunnen.

Un Größing Trude kümmt in Form
bi dei "Rägentrud" von Storm —
sei läst, as wenn sei't sülben weit,
wat Leif denn måkt, dat't rägen deit.

Bi'n Vörläsparty, dat is klor,
gifft dat twors kein Tupperwor,
doch all, dei up dei Party wiern,
will'n nu sülben läsen lihrn.