Party inne Dönsk:
Schauhparty in Wien

vun Behrend Böckmann

Frugens, dei besonners schlau
mit 'n Tick för niege Schauh,
kriegen oft dat grote Janken
up niege "High Heels" in Gedanken,
un wat wier dor 'n Party schön,
up dei man sik künn Schauh anseihn.
Un dei Gedanke wür nu wohr,
denn in Wien gifft all por Johr
näben Tort in Café Sacher
dei Schauhparty as niegen Kracher.

'n Schauhhöker den Infall kreech,
'n "High Heels"-Party wier nich leech,
dei man inne Dönsk afhöllt,
dor Schauh probiert un denn bestellt,
doch Onleihn kiekt man in Vörut
niege Schauh nå Grötten ut.

Dei Höker däd Fine noch råden,
wurväl sei süll an Gäst inlåden,
ok stellt hei ehr denn in Utsicht,
dat's 'n "High Heels"-Gautschien kricht!

Wat bubbert Fine nu dat Hart,
wenn ut ehr Dönsk 'n Laden ward,
wenn 'n Dutzend flott marschiert
un Stöckelschauh denn utprobiert!
Dor all denn niege Schauh hemm' nåhmen,
is Fine ok tau Niege kåmen.