Party inne Dönsk:
Dei Schmuck-Party

vun Behrend Böckmann

Dei Schmuck-Party

Nåwers Fru, dei schmuck Katrin,
wull mål giern Fru Heister* sien
un hürt wat von den niegen Trend
von'n Party as 'n Schmuckevent —
un finnt onleihn 'ne Fru denn rut,
dei disse Party richtet ut.

Katrin mösst sei nich lang bäden,
dat's mit Klunker, Ring'n un Käden
so as ümmer frohgestimmt
tau dei Glitzer-Party kümmt.
All freugen sik nu weit wie dull —
bi Katrin ward dat wunnervull.

Un achter Glös mit witten Wien
schämert Schmuck in'n güllen Schien:
Ringen, Käden, Uhrgebammel
un näbenbi lütt bäten Hannel —
un nå twei Stunnen jede kennt,
wat Schmuck angeiht, den niegen Trend.

*Heister = Elster

Dei Amwayhökersch

Placken hemm' uns Rosi stürt,
un as sei wat von Amway hürt,
hett's bi Frieda Fründt anbannelt,
dei tau Tiet för Amway hannelt,
dei mit disse gauden Woren
deit von Urt tau Urt nu fohren,
måkt œwerall mit väl Hurra
Reklåme för Amerika.

Dei Dönsk von Rosi proppenvull,
doch dei Party löppt nich dull;
von dei Frugens, dei wiern kåmen,
hemm' sik twei blot wat mitnåhmen,
denn all dei annern wiern sik wiss,
dat "Fit" dat düütsche Amway is,
dat as besonners fründlich gellt
gägenœwer uns Ümwelt.