Party inne Dönsk:
Dessous Homeshopping Party

vun Behrend Böckmann

Tilda drömt von'n Happening
mit Dessous in'n Homeshopping,
von'n Buster as 'n Körperhüll
ut den allerfiensten Tüll,
von'n Body ut 'n rode Spitz
mit Dörchblick wull in jede Ritz,
von Babydoll as Nachtgewand,
von Ünnerwäsch mit ein Strumpband,
an Ünnerwäsch, dei einst wier dacht
för'n Jumfer inne Hochtietsnacht.

As dit güng Tilda dörch den Sinn,
söcht's ein "Lingerie-Beråderin" —
dat sünd hannelsdüchtig Damen,
dei denn tau dei Party kåmen,
up wecker denn ward gor nich spoort
mit Ünnerwäsch von fienste Oort.
Ünner sik ward anprobiert,
inne Dönsk ümhermarschiert,
man lött Champuskorken knallen
un deit dorbi lütt bäten mallen.

Noch weit man nich, an wat dat licht,
dat dei Stimmung so dull sticht...
Villicht is dat dat grote Glück,
dat dei Frugens ünner sik
so vergnäucht mit nåkelt Busen
as Immen flott herrümmersusen
so as Dank för dat Geschenk
an dei Fründin Tilda Renk,
dei dat sülben fünn nich leech,
dor's teihn Purzent von'n Ümsatz kreech.