Hei kunn sien Kopp nich bögen

vun Hildegard Tölke


Dat ole Auto van Otto is einkennig. Mit den greuen Dieselmercedes fäuhert hei mangers ganz sinnig un behott noch uppe Straoten. Bi dei Ampel düert dat immer 'ne Tied, bit hei wedder inne Gänge kummp. Dei Lüe kennt üm aale. Mit siene 89 Johr will hei partout sien Führerschien nich affgäwen.

Dei Kinner nähmt üm in 't Gebett. Faoken naug häbbt dei üm dat all vörbäet. "Papa, du bis tau langsaom. Du maoks noch maol Malör." Dann kummp dat fuchtig van üm trügge: "Ick, ick häbb mien Führerschien all siet 1952. Un uck noch kien groten Bums maokt. Gaoht mi doch hendaol."
"Jao, dat mag woll wän", kummp dat van siene Dochter trügge. "Ick sägg di dat nu liek vörn Kopp. Dat is bloß gautgaohn, wiel dei ännern Autofohrers uppasst häbbt."
Otto wedd fuchtig. "Ick kann noch gaut seihn un hörn. Un den Weg nao dei Bank, nao Aldi un nao Karken, do kaom ick gaut taurechte. Ick passe all up. Mien Führerschien beholl ick, bit ick dod bliew. Ick hauß jau wat."
Otto draiht sick ümme un is so dull as 'n Zissemännken.

Dei Dochter un uck dei Enkelkinner bietet up Granit. Otto is ein Sturkopp, ein ollen Wiespint. "Do sett ick jau 'n P vör. Kummp nich in Fraoge! Dat fallt mi in Droom nich in! Ick feuhl mi sicher uppe Straoten un mien Auto kenn ick genau", resulfeiert hei sick. "Wenn ick den Führerschien affgäwe, sitt ick bloß noch tauhuus."
"Opa, ich will di doch woll gern fäuhern", verspreck üm dat öllste Enkelkind.
"Dat fählt mi noch jüss. Häss eierste 2 Johr dien Führerschein. Dann kanns du noch lange nicht autofäuhern!"

Vör poor Wäken möss Otto nao 'n Dokter. Hei häff faoken so 'n Ramm in rechten Faut. Nu fäuhert hei, so as aaltied, rücklings ute Garage. Ditmaol aower tau wiet un dwask äöwer dei Straoten. Dei Fohrt is eierste maol an Lindenboom tau Enn. Hei ritt dat Stüer nao links, draiht un versöch wedder liek uppe Straoten tau kaomen. Dat Auto maokt ein'n Satz un suust liek langers anne Müern van' Naober. "Mit mien Auto man drocke wedder trügge inne Garage", schütt üm dat dörn Kopp. Siene Hand rettket. In sien Tatter trett hei dat Gaspedaol vull dör. Aohne Bremsen gaiht dat liek vör dei Garagenwand. Dei Naoberin hört den Bams un sütt Otto ganz benaut achtert Stüer. Blaut drüppket van Kopp un ute Näsen.


Dat gröne Auto is nich mehr in'n grönen Beriek!

Nu gaiht dat dei Riege nao: Malteser, Notarzt, Krankenhuus un Polizei. Nu sitt hei faste inne Pickpannen.

Nao sess Wäken is Otto wedder dor, aower aohne sien grauen Lappen mit sien "Jugendbild". Sien Dieselmercedes is in Dutt un dortau kaomt 9.000 € Schaoden för dei Garage. Otto kunn sien Kopp nich bögen, aower nu.


17.9.2020


na baven