Öller warrn

vun Katja Renfert


Wo is dat egentlich mit dat Öllerwarrn?
Güstern hett mi een Fru froogt: "Segg mol, warrst du nich düsse Daag süßtig?"
An leevsten harr ik to ehr segg: "Klei mi an'n Moors!", aver ik harr denn bloots gnegelig antert: "Ja, aver ik heff dor nich op luurt!"

100 Kubik!"Wieso dat denn nich? Kannst di doch freun!", meent se.

Avends överleggt ik: Wat gifft dat denn to freun, wenn ik süßtig warr? Meenst, dat Leven holt nu op? "Dumm Tüüg!", schull ik mi sülms, dat is man bloots 'n niede Station, wenn du so wullt. Un denn fallt mi doch'n ganzen Barg in: to'n Bispeel, ik bruk nich mehr to arbeiden. In mien friee Tied suus ik mit mien hunnert Kubik Motorroller dörch de Gegend. Dor bün ik bannig stolt op, denn dat gifft ja nich so veele Fruunslüüd in mien Öller, de dat dot. Naja, letzt harr ik an'ne Elv 'n Fru dropen, de keem uk mit ehrn gröteren Roller anneiht. Se hett mi vertellt, nu is se söventig; as se achunföftig weer, is ehrn Kerl afzischt, un dat Auto harr he mitnomen. Denn harr se extra noch den Motoorradföhrerschien makt, dormit se uk 'n gröteren Roller fohren kann. De lüttjen föftiger Kubik kannst vergeten, de stinkt und sünd luud, un willst jo in Verkehr uk vörwarts komen. Ik mark dat, wenn ik bi mien "Red Dragon" eenmal an'ne Ampel an'n Gashohn treck, denn geiht de fix af, dor leggt de Autofohrers noch erst 'n Gang in.

Tja, un denn heff ik natürlich mien Fohrrad, womit ik uk dörch de Gegend gondel, und letzt heff ik mi niede Skates köfft. Un wenn den Helm dorto sühst — echt geil, mit'n Dodenkopp baben op. Kannst jo nu dinken, wat du wullt; ik weet, do, wat du wullt, de Lüüd snackt doch.

An de Elv

Wenn ik ünnerwegens bün, nehm ik mien twee Digitalkameras oder den Camcorder mit, wo ik al lüttje Videos mit makt heff. Alleen in Hamborg gifft dat jümmer wedder niede Saken to entdecken.

So veele Seen und Parks, dat haut di um. Un dat harr ik vörher nich wuß. Dat fotografeer ik allens, un denn wies ik dat annere Lüüd. Nee, ik goh dormit nich rüm. Ik heff an'ne Staatsbökerie en Lese-Utwies. Dormit kann ik Böker utlehnen un söven Daag in'ne Week in't Internet. Ik heff twor mien Computer to Huus, aver den nehm ik bloots to'n Schrieven. So billig as mit'n Lese-Utwies krieggst dat narmswo, un denn bruukst uk keen Angst to hebben mit "Viren" or wo de ganzen Saken heet. Dor ünnen in'ne Medienwerkstatt in'ne Bökerie hebbt se mi wiest, wo ik mit mien Spiekerkoorten vun'ne Kameras Foto-CDs brennen kann. Denn stell ik miene Fotos in't Internet un schick E-Mails to de Lüüd, dat se sik dat ankieken köönt. Also, ik bün begeistert, denn ik sitt nich to Huus rüm an Computer, un in'ne Stabi, wo dat heet, dröp ik uk jümmer annere Lüüd.

Plakat/CollageIk mook uk siet poor Johren Utstellungen mit mien Fotos, un hier heff ik'n "Saleroom". Dat heet hüüttodaags, ik bün online.

Ach, un nu fallt mi uk noch annere Fruunslüüd in, de ik kenn. De sünd noch öller as ik, söventig, tachentig, negentig vörbi! Un weets wat? De schrievt, molt, poor speelt Theater — schast di wunnern, de mokt so veele kreative Saken. Naja, fröher harrn se uk ni de Tied dorto. Wenn arbeiden deist un uk noch Familie hest, nä. Wenn dat wegfallen deit, hest 'n Kopp frie un kannst kieken, wat du nu mit dien Tied moken wullt.

Wenn denn wat utprobeerst un markst, och, is doch nich so mien Ding, na, denn söchst di wat anners. Un kriggst jo uk jümmer Anregungen vun'ne annern Fruunslüüd.

Ik glöv, wenn du versöchst, jümmer nieschierig to blieven un positive Dingen för di to finnen, gifft di dat Kraff. Denn hest gor keen Tied mehr to kieken, of du villicht krank büst. Dat eenzige Problem is denn bloots: du muttst oppassen, dat du nich to veel makst vun de Saken, wo du op eenmal Vermaak an hest. Sunst warst noch krank vun'n ganzen "Freizeit-Stress", un dat wöllt wi jo uk nich, oder wat?

De Motorroller - en Stück Frieheit


Fotos: Katja Renfert
8.3.2009


na baven