Nikolauslopen 2022

vun Meike Balzer-Fraun

07.12.2022

Bi uns warrt de schöne Bruuk vun't Nikolauslopen pleegt: Kinner treckt dör't Dörp, draagt Versen vör un verdeent sik dormit Snoopkraam. Ik harr güstern Avend jüst allens för de Nikolauskinner praat, dor pingel dat ok al, un twee Grundschooljungs stunnen vör de Döör:

"Advent, Advent, ein Lichtlein brennt.
Erst eins, dann zwei, dann drei, dann vier,
dann steht das Christkind vor der Tür",

nussel een vun de Jungs vör sik hen. De annere harr rein gor nix to mellen.

Dree verscheden Saken dörv sik jeedeen ut mien Söötkraam-Sammelsuus utsöken.
— Tominnst en "Danke" kreeg ik to hören.

Beten wat later stunnen dor dree öllere Jungs.
De Gröttste harr bannig öövt! He see mit veel Geföhl un Betonen en langet schönet Wintergedicht op. So as ik dat wennt weer, hett he sik ok bedankt.

De beiden annern versöchen "Advent, Advent, ein Lichtlein brennt" tohooptokriegen. Een jümmers twee Wöör achter den annern ran. Se harrn dat seker nich öövt, man kunnen mi noch vertellen, dat ik Wiehnachten verpennt harr, wenn dat föffte Wasslicht brennen dee.

De Lüttste fung denn an to diskereren, wat woll en annersfarven Schokoladenpapeer ok en ‚annere Saak' weer. Dormit kunn dat Sluusohr bi mi aver nich lannen!
Driest dreih he sik to den groten Jung üm un meen: "Tja, hätt' ja klappen können, nich!"
Keen Respekt nich vör en ole frömde Fru, bi de he doch an't Huus weer.

Teemlich verbaast weer ik denn doch al. Man dat ik na't Nikolauslopen ok noch Schokoladenpapeer ut mien Vörgoorn opsammeln mutt, harr ik vun 1980 bet güstern noch nich beleevt.

13.12.2022

Veel heff ik de letzte Tiet över dit beten wat trurig Nikolausbeleevnis nahdacht! De Kinner ehr Schuld is dat ja gor nich. Dat sünd de groten Lüüd to Huus, de nich mit ehr Kinner snackt, de sik keen Tiet nehmt, mit jem to öven, jem en beten bi't Verkleden to hölpen, jem Maneren bitopulen.

Dat sünd villicht ok de groten Lüüd in de School, de bi all de proppenvullen Wekenplaans keen Tiet nich findt för en Gedicht oder en Wiehnachtsleed.

Hett ok Corona dor Schuld mit an?
Vör Corona weer ik ‚Leseoma' an en Grundschool. Watt hefft se fein klütert, sungen, butenkopps opseggt, backt un daan! Wat hefft se sik höögt un blangenbi so veel dorbi lehrt!
De öllern Jungs un Deerns weren in't Theater, mit'n Toog, Bus un Stratenbahn op'n Wiehnachtsmaarkt in Bremen oder Strietschohlopen in de Ieshall. För männicheen Kind weer't dat eerste Mal, in de grote Stadt ünnerwegens to sien! Un sogor ahn de Öllern! Wat weren se stolt!
De verleden Johren meisttiets ‚Homeschooling'.

Un dit Johr? Nix as Bargen vun Tests un jümmers mal wedder ‚Homeschooling' mit en vullen Wekenplaan. Tominnst sünd uns Enkelkinner in de School dit Johr noch nix vun Wiehnachten nich wies warrn.

Hefft wi jümmers un överall to veel kakelbunte lude Wiehnachten, Lüchten, Punsch, Söötkraam, Leder, Dekoratschoon un Gedööns, dat en Nikolausgedicht keen Bedüden mehr hett?
Bün ik blots en torüchwartsdenken olet Wief, wenn ik de Nikolaustraditschoon un so'n beten kommodig Wiehnachtsföhlen wohren mag?

Oder warrt ‚Black Friday' bald uns eenzig Vörwiehnachtspläseer?