Nikolauslopen 2022 vun Meike Balzer-Fraun 07.12.2022 Bi uns warrt de schöne Bruuk vun't Nikolauslopen pleegt: Kinner treckt dör't Dörp, draagt Versen vör un verdeent sik dormit Snoopkraam. Ik harr güstern Avend jüst allens för de Nikolauskinner praat, dor pingel dat ok al, un twee Grundschooljungs stunnen vör de Döör: "Advent, Advent, ein Lichtlein brennt. nussel een vun de Jungs vör sik hen. De annere harr rein gor nix to mellen. Dree verscheden Saken dörv sik jeedeen ut mien Söötkraam-Sammelsuus
utsöken. Beten
wat later stunnen dor dree öllere Jungs. De beiden annern versöchen "Advent, Advent, ein Lichtlein brennt" tohooptokriegen. Een jümmers twee Wöör achter den annern ran. Se harrn dat seker nich öövt, man kunnen mi noch vertellen, dat ik Wiehnachten verpennt harr, wenn dat föffte Wasslicht brennen dee. De Lüttste fung denn an to diskereren, wat woll en annersfarven
Schokoladenpapeer ok en annere Saak' weer. Dormit kunn dat Sluusohr
bi mi aver nich lannen! Teemlich verbaast weer ik denn doch al. Man dat ik na't Nikolauslopen ok noch Schokoladenpapeer ut mien Vörgoorn opsammeln mutt, harr ik vun 1980 bet güstern noch nich beleevt. 13.12.2022 Veel heff ik de letzte Tiet över dit beten wat trurig Nikolausbeleevnis nahdacht! De Kinner ehr Schuld is dat ja gor nich. Dat sünd de groten Lüüd to Huus, de nich mit ehr Kinner snackt, de sik keen Tiet nehmt, mit jem to öven, jem en beten bi't Verkleden to hölpen, jem Maneren bitopulen. Dat sünd villicht ok de groten Lüüd in de School, de bi all de proppenvullen Wekenplaans keen Tiet nich findt för en Gedicht oder en Wiehnachtsleed. Hett ok Corona dor Schuld mit an? Un dit Johr? Nix as Bargen vun Tests un jümmers mal wedder Homeschooling' mit en vullen Wekenplaan. Tominnst sünd uns Enkelkinner in de School dit Johr noch nix vun Wiehnachten nich wies warrn. Hefft wi jümmers un överall to veel kakelbunte lude Wiehnachten,
Lüchten, Punsch, Söötkraam, Leder, Dekoratschoon un
Gedööns, dat en Nikolausgedicht keen Bedüden mehr hett?
Oder warrt Black Friday' bald uns eenzig Vörwiehnachtspläseer? 17.12.2022
|