Nawerschaft

vun Günter Weber


Ik glöv, dat is nich blot bi uns in Dörp so. Dat is hier an den ganzen Niederrhein so. Besünners in de Dörper. Hier kennt ja een den annern. Uterdem sünd se hier allemal vun katholischen Gloven. Nee, poor Evangelen sünd ok twüschen, man wiss blot teihn Prozent. Wi sitten so bäten in de Diaspora. Sühst, un de Nawerschaften sünd vun katholische Geburt, um dat mal so tau seggen.

Arm, ja, richtig arm weren sei hier Johrhunnerde. Dat gäw Baronen un Graven, de gifft dat hüüt ok noch. De hebben dat Land un den Wald ehr Egendom benömt. De Armen mussten mal tausamen hollen. Dat weern de iersten Nawerschaften. Hier seggen sei "Arm un schmerig". "Arm und nicht immer ganz sauber."


"De Kommiesen" sünd nich mies, se weern fröher mal vun'n "Kommis", den Staat.
Hüüt hebbt se egen T-Shirts. Ok de Verfater (vörn, mit Snurrboort) is en Kommiese

Nu bin ik al över föfftig Johr hier un tomindest dörtig Johr in de Nawerschaft "de Kommiesen". Dat kümmt dorvun, dat hier dunnemals op disse Straat alleen Zöllner wahnten.

Mit de Johren is dat natürlich anners worrn. Dat ist goot so, dat tau de "Olden" ok poor "Junge" buut hebben. De Gemeenschaft is noch ümmer dor, wenn ok nich ut de Noot boren. Wi marken da wat vun.
Huh... huh, da schütt doch denn eenen Nawer den Vagel af. Nu is hei för de Kermes (dat Kirchweihfest fröher) Schützenkönig. De Nawerschaft hett denn de "Residenz" düchtig utsmückt.


Heinz-Theo, den Schützenkönig, un Sonja geiht dat ja mal good. Bild: Günter Weber

Dat Postenhuus dorachter käm ok noch na vörn. Wi funnen ok noch so een ole geele Telefonzell, wiel de Nawer ja Direkter bi de Telekom is. In dat Hüsken seet noch en Swesterpopp, wiel sien Fru ja Röntgenassistentin is. All dat Gröne schnieden, de Latten tosamentümmern...! Sage un schreibe 4ooo Rosen hebben de Fruenslüüd friemelt. Satt för "intauriewen" geev dat ok. (Natürlich vun binnen.)

Ja nu, Rauh, nee, Rauh hebbt wi nich hatt. Stück de Straat rop hett en Nawer Sülwerhochtied. Dat woor fiert. Nawerschaft-Huis schmücken. Aver nich nochmol mit den "Triumphbogen". Nee... nee, wi sünd dor mit "Experten" bestückt.

Bi Helmut word de Plan maakt. Die Fruenslüüd seggen, wie dat mutt, un nu buut man schön.

Hebben wi ok dohn. Ik weit nich de Taal vun Stunnen, de ik alleen seten heff. Grön schnieden, Gestell tosamentümmern, Maschendroht spannen, Polyesterplatten inbuun un so wieder un so wieder. Un nich bloot ik. De annern ok, so wie sei Tied hadden. Nee, de Sülverhochtiedler hebbt dar nix vun to weiten kregen. As wi dat Hart opbuuten, hebben sei weent vör Rührung.


Na dat is ja mal en Ingang!

An Avend is dat Hart ok noch indirekt belücht. Hebbt wi ok noch inbuut.

De Pastor vun de Katholen nöhm sich in siene Prädigt ganz besünners "das Machwerk" vun de Nawerschaft vör. Wi sünd nu vull Stolt dat Vörbild för de ganz Gemeend.


10.2.2015


na baven