Enerwaars in en oostfreeske Stadt. Midden up de Marktplatz harren de Lü van de Bühn de Stall to Bethlehem upbaut, groot genoog, dat de Krübb, umto mennig Strohball, un Oss un Esel daar Bott in funnen. Nuja, de Oss was en Koh, man se was ant Muhen, as wuss se, dat se ok en Rull bi dat Krübbenspill to spölen harr. Of un an leet ok de Esel en Iah vernehmen.

Hunnerte van Minsken harren sük infunnen, Ollen un Jungen, Kind un Kegel, sük dat Spillwark antokieken, as dat Jesuskimdje upstahn was.

En Spreker vertellde de Wiehnachtsgeschicht up Platt, en Posaunenchor spöölde Wiehnachtsmusiek un en Chor sung plattdüütse Leder to Advent un Wiehnacht.
As de Spreker see: "So gung ok Joseph van Galiläa up Fahrt un kwamm van Nazareth na Judäa, na David sien Stadt mit Naam van Bethlehem, umdat he van David sien Herkomen un Familje was, un wull sük inschrieven laten mit Maria, de hum antraut was, de gung up 't Lesd un verwachde elke Ogenblick wat Lüttjes", do kwammen Maria un Joseph na de Stall henlopen. Se wassen nett bi en Harbarg ofwesen worden. Dat düürde neet allto lang, un Maria kreeg hör Kind, wickelde dat in Doken un leggde dat in de Krübb.

Wieldess eerst de Heerders un denn de Hillige Dree Köninks dat Chirstuskindje anbeden deen, seet Maria bi de Krübb un leet kenn Oog van dat Lüttje. Se harr en blaue Dook over de Kopp, dat hör Gesicht man even to sehn was. En zarte Gesicht mit en besünners unschüllige söte Utkiek. Leve Ogen mehr na binnen as na buten. Dat Glück was Maria antomarken un hör Gesicht strahlde van Hartensgodigheid.

En hele Koppel Engels suusde daar herum, all in witte Gewanden un mit Flögels up de Rügg, grote Engels un lüttje, Jungs un Wichter. En van de Jungs keek Maria stillto an. He harr schiens vergeten, dat he en Rull to spölen harr. Sien Hart puckerde hum to de Hals rut. De junge Mann mit Naam van Gabriel harr blot noch Ogen för de Maria, he kunn sien Ogen neet van hör laten.

Maria sloog de Ogen up un wurr gewahr, dat disse Engel vull van Leevde to hör was. Un ok se föhlde in sük wat wassen, un de Leevde kwamm over hör.

Dat Krübbenspill hett de Tokiekers vööl Bliedskupp schunken, so as dat to Wiehnacht nix as Bliedskupp geven sull.

Na Wiehnachten wurr de Stall van Bethlehem weer ofbaut. De Schauspölers gungen elk hör egen Padd. Van de Engels gung de een hierhen, de anner daarhen.

Daar wurr vertellt, dat de junge Frau, welke de Maria spöölt harr, negen Maant later en Baby kreeg, en Jung, de se Gotthold nöömde.