Hans im Glück, © flickr kweinland

Märkenraden

vun Karl-H.Nissen


De Dannenboom is afrüümt. Wi harrn dit Johr man so 'n lütten in'n Pott. De hett ja Vördele, dat seh ik in. Man so 'n groten Boom, bet an de Deck, de weer doch noch schöner.

Tja, hett Anneke seggt, bet an de Deck is goot. Man för diene Dannenbööm bruukt wi alle Johr en Lock dörch de Deck. Un disse Snacks laat ik mi nich gefallen — dorüm nu so 'n lütten Boom!

De is fix afputzt, de poor Kugeln sünd gau wedder in de Kartons packt. All den Lüttkraam insammeln, so as Engels un lütte Sleden un Wichtel — Anneke hett enen Barg vun so wat —, dat hett ehr Arbeit maakt. Se seggt, dat bringt ehr Spaaß.

Un ehr fein Adventskalenner — den harr ehr Fründin ehr schenkt —, de is ok in den Keller kamen. De weer en wunnerlich Dings, de Kalenner: en Ritterborg mit 24 Torms. Un de Spitzen vun de Torms leten sik afnehmen un binnen weern lütte Zettel versteken. Up disse Zettel stünnen Radels. Wi sullen Märken raden.

Haas un Swienegel. Bild: Wikimedia Commons/Gustav Süs
Haas un Swienegel. Bild: Wikimedia Commons/Gustav Süs

Dor stünn denn, so as Exempel: "Wer pfiffig is, kann auch ohne Anstrengung gewinnen". Na, weest Bescheed? Klor, dat is Haas un Igel.

Up en annern Zettel stünn: "Ballast abwerfen, das bedeutet Glück". Keen Fraag, dat is Hans in'n Glück.

Wi weern elkeen Morgen richtig gespannt up de nie Märken-Fraag. Un dorüm wullen wi uns Kinner ok mal testen, wat de woll de ollen Geschichten noch kennt. Bi den Niejohrskaffee hebbt wi de Zettels mitnahmen un fraagt — un wi weern platt. Wi harrn de Fraag noch gor nich ganz vörleest, denn wüssen de al de Antwort. Wi harrn nu dacht, de jungen Lüüd verstaht wat vun Computer, man ut dat Märkenöller weern se lang rut. Harrn wi dacht. De wüssen goot Bescheed, un wi Ollen hebbt uns höögt.

Un Se? Wo is dat hier mit: "Verarmte Rentner gründen Künstler-Initiative"?

Orrer dit: "Durch einen "Lauschangriff" wird eine Kindesentführung verhindert"?

Priese sünd hier nich to gewinnen!


(Lösungen: Dat eerste: Süh Bild in'n Achtergrunn! Dat tweete: Süh hier)

Achtergrundbild: Wikimedia Commons/Wuzur
15.1.2009


na baven