"Du suchst ein Geschenk? Mag er/sie Musik?" Dat weer de Reklaamsprook vun den Schallplattenladen "2001" (Böker harrn se ok), as ik noch in Hamborg bi to studeren weer. Dat letzte weer en rhetorisch Fraag, denn naklaar mag he/se Musik! Also rin un Platte köpen. — Later kemen de CDs, na dat güng ja noch, ok wenn dat al minner woor. Hach ja, dat weern de goden olen Tieden!! Man hüüt — allens is bloots noch MP3 un online, un wokeen verschenkt denn en Download?! Bavento kümmt de mehrst as Goodschien vörtüüch. Un Goodschiens schenken — also dor kannst ja eentlich glieks en Geldschien verschenken, nich? Geldschiens sünd doch de universellen Goodschiens. Dat is doch maximal unromantisch!

Romantisch mutt dat nich jümmers ween, verstaht mi nich verkehrt. Man wokeen hett dat noch nich beleevt: För Fruuns gifft dat dusend Mööglichkeiten, man woans beschenkst du en Mann? Ja, wenn de Mann di heel nah steiht, is dat wat anners. Denn kennst du sien geheime Wünsch, weetst, wat he bruukt un mit wat du em so överraschen kannst, dat he sik freit. Man ik meen en Mann, de di so mittelnah steiht. En gode Bekannte. Mi hett en gode Bekannte annerletzt en smucke Blomenvaas schenkt. Avers ik bün en Fru. Mit en Mann kannst dat nich maken — de kriggt ja nich mal Blomen. Em en Vaas to schenken weer denn eentlich en Geschenk an — sien Fru, sien Partnersche. Dat kümmt veel öfter vör, as een denkt: dat via den Mann eentlich de Fru beschenkt warrt. Un de Mann is't mehrstendeels tofreden. Männer sünd ja verdrääglich un bescheiden.

Denkt aver gor nich eerst, dat Böker en Opschoon sünd. De mehrsten Mannsminschen leest nich. Partu nich. Jedenfalls keen Böker. De apensichtliche Mangel an Begeistern, wenn du mit en Book ankümmst, snackt Bände. Bände, de ok keen Mann lesen warrt. Laat de Finger dorvun — ok wenn du weetst, dat he t.B. op Fantasy-Literatuur steiht. Du kannst ok dorbi so veel verkehrt maken!! Laat di lever nipp un nau den Titel seggen. Man denn is dat ja nich so richtig en Geschenk, nich?

Överhaupt sünd Geschenke, de sik verbruken laat, de besten Geschenke, denn denn kannst jümmer wedder naleggen. Man finn sowat! Kannst ja en goden Bekannten nich de typischen SOS-Geschenke (Slips, Oberhemden, Socken) maken! Dat hett doch wat Plumpvertrulichs, sünnerlich de Socken. Dat sünd Geschenke, de een sik in de Familie maakt.

Du denkst an Kosmetik un Bartöle? Stimmt, ok för Mannslüüd is dat hüüt en Thema. Man Kosmetik is en heel persöönliche Saak, jedereen hett sien Vörleven, sünnerlich bi Duft; un Bartöl verbruukt sik nich so fix. Du weetst nienich nau, wat den Beschenkten gefallt... Pass op, dat du hier nich wedder in de Goodschien-Falle rutschst!

Beten lichter warrt dat, wenn de Mann en Huusdeert hett. En Hunnenspeeltüüch orr en Vörraad Leckerlis kann nütt ween. Wedder avers warrt nich de Mann sülvst beschenkt, sünnern bloots indirekt — beschenkt warrt de Hund. Oder de Katt. En Fründin vun mi hett mal en männlichen Bekannten mit Katt en Geschenk maakt: Kattenshampoo. Wat ja ok heten kann: Dien Katt stinkt! Is dat charmant? Nee. Un denn wedder is dat ja nich de moiste Kraftakt, en Katt to baden. De Katt findt dat bestimmt nich good, un will de Mann dat överhaupt? Mit sowat is eentlich keeneen beschenkt — weder de Mann noch de Katt.

"Technik!", höör ik di ropen, "Männer leevt Technik, schenk jüm welk!" Dat hett mien Kollegin Bella ok daan, mit ehrn eersten Mann. Se hett em jümmers wat nieges Technisches schenkt, to Wiehnachten, to'n Bortsdag... De Mann weer oprichtig begeistert, hett dat Geschenk nau studeert un sik för de niegen Mööglichkeiten begeistert — un is hengahn un hett sik dat lieke Gerät in en dürere un perfektere Verschoon köfft. Bellas Geschenk flöög in de Eck. — Keen Wunner, dat de Eh in de Grütt güng!

Nee, leven Lü, wenn ik allens bedenk, kaam ik jümmers wedder bi den Restaurantgoodschien an. Dat is twoors en Goodschien, avers du wählst dat Restaurant ut. So hett dat doch noch wat Persöönlichs. Natüürlich muttst du denn tomehrst en Goodschien för twee köpen — wenn to den Mann en Fru tohöört. Un welk Aart Restaurant schast du wählen? Wenn du nich weetst, wat de Mann mang (orr wenn he dat sülven nich weet)? — Keen Problem: Frag de Fru! Ehr Smack entscheidet.