Schöne Geschichten

vun Karl-H. Nissen

Dat is jümmers noch dor, dat Fröhstücksbrett in uns Köök. Dat strahlt as Sünnenschien un dor steiht up „Lächeln“.

Ik geev mi je Möh dormit un männichmal klappt dat ok, as Bispill, wenn Anneke mi so gegenöver sitten deit. Man wenn ik denn in uns Blatt kiek! Ach nee: Tohuwabohu in Amerika, hier un dor un överall scheet se sik doot, dit Fleesch süllt wi beter nich eten un vun de Wahl snack ik gor nich eerst. Wenn ik lees: Buurnhuus afbrennt, Lüüd un Veeh sünd nich to Schaden kamen, denn is dat al en gode Naricht.

„Du müsst mal en beten söken, dat gifft so veel to’n Freuen. Kiek, dit Wahlplakat: dat is en Walplakat! Dor is wieder nix up as de Steert vun enen Wal. Na, nu geiht doch so’n lütt Lachen över dien Snuut. — Un denn alle Daag de “Witz des Tages“, dor müsst du doch en vergnöögt Gesicht maken. Orrer nimm dit hier: „Chorsänger is en wunnerbor Beruf“. Wenn een sowat seggt vun sien Arbeit, dat is doch wat. Freu di mit.“
„Ja, ja, avers mien Footballverein, de deit mi so leed, un de DAX, de maakt mi Sorgen.“
„Dat is doch Dummtüüg, du hest doch gor keen Aktien. Kiek, dit müsst du mal lesen, dat gefallt di.“
Se harr dat schafft, ik weer neeschierig.

Dor hett en junge Fru wat schreven över den Peerindex. Ik weet nich, wat dat is. Man dat maakt Spaaß, woans de mit de Wöör ümgeiht. Se schrifft nich vun Persien, se schrifft vun Peersien un vun Peersil.“ Ik heff dat tweemal leest, hett mi gefullen.
„Un du müsst nich blots all den legen Kraam up de vörderst Siet lesen. Kiek di doch mal de lütten Anzeigen an, so as disse hier: „Er sucht Frau für eine Beziehung“.
Ik heff mi dat denn vörstellt, wo dat lopen kunn – un denn kunn ik nich anners, denn heff ik „lächelt“.