Maria mit dat Book. Foto Cord Denker.
Klick op to'n Vergröttern!
|
Düsse Bank is för Minschen dor
vun Cord Denker
Wenn de Döör vun de Kark in Haria op Lanzarote open steiht,
denn geihst du rin, üm di dor ümtokieken. Villicht gifft
dat jo dor binnen mehr to sehn as buten. Man, denn markst du ganz
gau, dor gifft dat nix to kieken. Oder doch? Fallt di an de Marien-Figuur
dor vöörn rechterhand wat op? Richtig!: Maria hett keen
Jesus-Kind in'n Arm, nee, se hett een Book in de linke Hand. Un ut
dütt Book hett se mi in de Advents-Tied een Geschicht vörleest,
de ick meist nich glöben kunn. Ick vertell di de Geschicht, de
ganze Geschicht. Awers mag sien, un du froogst, wo denn nu dat Jesus-Kind
weer. Tja, villicht weer dat al op den Weg to uns Minschen.
Harry Martens weer Buuschlosser, man en Unfall harr em ut den Beruf
rutsmeten, lang vör dat Renten-Öller. He weer en Minsch,
de siene Hannen rögen müss. Op den Böhn
öber de Garaag harr he sick en Warksteed för Holt-Arbeiten
inricht. Dor klüter he Poppenhüüs, Poppen-Möbel,
Schunkel-Peer un anner Kinner-Speeltüüg. Wenn't op Wiehnachten
to güng, denn weern dat Krippen un Krippen-Figuur'n un Lichter-Bögen
un Dannenboom-Schmuck. Fröher bastel he man bloots för de
Familie un de Frünnen. Man wo he nu so veel mehr Tied harr, kunn
he ok mehr produzeern: nu weer dat sien Beruf.
Awers ok ut düsse Welt hett em dat Schicksal rutsett. Wegen
sien Diabetes hebbt em de Dokters so peu à peu beide Been afsäbelt.
Dor bleben bloots noch Stummels öber, an de man keen Prothesen
mehr fastmoken kunn. Se müssen dat Huus so ümbuu'n, dat
he sick mit sien Rullstohl dorin bewegen kunn, villicht ok mol rut
in'n Goorn oder en Stück wied op de Stroot. In sien Warksteed
sett sick de Stoff op de Maschinen un dat Warktüüch, he
kunn dor nich mehr hen. He weer deep unglücklich, un de Düüstergloben
breed sick in sien Seel ut.
Wenn
man em en Treppenlift to sien Warksteed hooch insetten kunn, un boben
noch en tweten Rullstohl harr... Jo, wenn! Awers de Familie kümmt
al so mit de Schulden nich trecht. Un se hebbt ok noch Dochter un
Söhn an de Hacken, de mol dütt un mol dat bruukt. Nee, se
köönt sick dat nich leisten... Un liekers geiht Heidrun
Martens een Dag noh ehr Bank hen mit de Froog, wat se nich noch een
Kredit opnehmen köönt. Dat is en Fru, de düsse Bank-Filiale
ünner sick hett. Katharina R. höört sick fründlich
un gedürig an, wat Heidrun M. vörbringt. Un denn geiht se
mit ehr all de Posten dör, wat de Familie rinkriggt un wat se
utgewen mutt. Un dat süht nich good ut, un noch een'n Kredit
weer nich to verkraften. Awers Katharina R. seggt, se wull dor an
denken, wenn sick en Gelegenheit wiesen wörr... Wenn sick wat
doon schull, ward Heidrun noch vun ehr höörn.
Heidrun hett dat versöcht, tominst hett se dat versöcht.
Un se weet nu noch düüdlicher: Wat nich geiht, dat geiht
nich! Wat se nich weet, is, dat Katharina R. op ehr'n Posten sowat
as en gode Fee is. Sied dree Johrn hölpt düsse Fru Lüüd
ut de Patsche, de finanziell in Bedrängnis sünd. Mol is
dat en Landmaschinen-Hannel, de vör de Pleite steiht, mol is
dat en Bäcker, de nich mehr gegen den Grootmarkt ankümmt,
wiel dat sien Backstuuw nich mehr noh Standard is... All dat weet
Heidrun Martens nich; dat weet nüms in uns lütte Stadt.
Katharina R. treckt Geld vun grote Plus-Konten af un schrifft dat
de Lüüd good, de finanziell an'n Afgrund stoht. Sowat hett
dat in dat düütsche Bankwesen noch nich gewen. Un dat ward
dat ok nie nich wedder gewen. All dat weet Heidrun M. nich. Vun Monat
to Monat kiekt se sick ehre Bank-Utdrucken an un is heilfroh, wenn
se an dat Schulden-Limit vörbi schrammt is.
Man een' Dag höllt Heidrun de Luft an: Wat is dat denn? Dor
sünd achteindusend (18.000) Euro op ehr Konto goodschreben. De
Kredit is also doch noch bewilligt. Hurra! Awers se köönt
em doch nie nich afbetohl'n, se versackt in Schulden. Na, se denn
wedder hen noh de Bank un mit "besten Dank!" den Kredit
torüch gewen. De Gang ward ehr schwoor, man dat mutt sien.
Heidrun
Martens sitt nu wedder bi Katharina R. in't Büro. Man de Filial-Leiterin
will nix dorvun weten un de Kredit torüch nehm'n: "Fru Martens,
düsse Bank is för Minschen dor, sünnerlich för
Minschen, de ohn egen Schuld in de Nood rinschliddert sünd. Nehmt
se den Kredit geern an un mookt sick keen Sorgen wegen dat Afbetohl'n.
Dormit köönt se anfangen, wenn se wedder fasten Grund ünner
de Fööt hebbt!"
Nohdem dat de Handwarkslüüd ehrn Deel doon hebbt, kümmt
dor wedder Lewen bi Martens in dat Huus. Harry fleit un singt. De
Treppenlift bringt em noh boben. Dat Geld hett langt, se köönt
sogoor fiefdusend (5000) Euro op een Schlag trüchgewen. Harry
schafft wedder wat mit siene Hannen un kann för Stünnen
sien Behinderung vergeten. He kriggt wedder sien Stand op den Wiehnachts-Markt
un he verköfft good. As dree Johrn üm sünd,
hebbt se den Kredit mit Zinsen un Gebührn torüch betohlt.
Heidrun Martens geiht nu noch mol mit een Blomen-Struuschen noh de
Bank hen un will sick bi Katharina R. bedanken. Man de is nich mehr
dor. Heidrun schnappt dat Woord "fristlos" op. Wat hett
dat to bedüden?
Jüüst in düsse Doog is dat opflogen, dat Katharina
R. egenmächtig de Konten umverdeelt hett. Öber acht Millionen
Euro hett se ut öbergrote Minschen-Fründlichkeit un Hölpwilligkeit
utschütt, man bloots söss Millionen sünd wedder rinkomen.
Nu, noh söss Johren, is de Revision dor achter komen, un een
Bank-Kunde treckt ehr ok noch vör Gericht, he hett dat markt,
dat vun sien stolt Spoor-Konto bloots noch en lütten Rest öberbleben
is.
Katharina
R. is kriminell. De Richterin kann dat meist nich foten, wat se dor
bi de Verhandlungen to höörn kriggt. Un mit dütt Resümée
geiht denn de Prozess to End: "Fru R., egens schull de Stadt
en Denkmol för se opstell'n, awers ick mutt se hüüt
verknacken: Noh Recht un Gesetz hebbt se Unrecht doon!"
Jo, so löppt de Geschicht ut: Katharina R. ward haftbor mookt
för den Schaden bi Bank un Versekerung. Öber twee Millionen
Euro sünd fällig. Dat geiht wied öber dat rut, wat
se tosomenkratzen kann. De Pfändung löppt, un se hett op't
letzt bloots noch en Lewens-Minimum. Man wat egens noch leger is,
dat Lüüd, de se ut de Patsche hulpen hett, achter ehr ranschimpt,
anstatt ehr to hölpen. Awers so sünd wi jo wol, wi Minschen.
Un dorüm mutt egens eenmol in't Johr dat lütte
Christkind op de Welt komen, dat unse Harten wedder en beten warmer
ward.
Süh, dat is de Geschicht, de Maria in de Kark to Haria op Lanzarote
mi in de Advents-Tied ut dat Book vörleest hett. Ick heff mi
bedankt un noch en Foto vun ehr mookt. Un as ick denn to Döör
wedder rut wull, heff ick mi noch eenmol noh ehr ümdreiht, üm
"hasta la vista!" to seggen. Do seeg ick, dat se den Wiesfinger
vun de rechte Hand oprichten dä, un ick wüss op'n Stutz,
wat se mi dormit seggen wull: "Nich vergeten! Düsse Fru
hett warraftig en Denkmal verdeent. Mutt jo nich groot sien."
De Achtergrund
In dat Blatt "Der Spiegel" ünner de Nr. 40/2010 hett
de Spiegel-Redakteur Bruno Schrep een'n Bericht schreben öber
en Fru, de en Bank-Filiale ünner sick harr. Düsse Fru hett
öber söss Johrn vun riek noh arm Geld verdeelt. Sowat hett
dat noch nich gewen in uns Land. An't End stunn Katharina R. för
Gericht un weer achteran arm as en Karkenmuus un harr ok noch den
Spott to drägen. Düsse Geschicht, "de dat Lewen schreew",
hett dat Hamborger Stroten-Magazin "Hinz & Kunzt" opgrepen
(N° 214, Dez. 2010). Dat is also dat Achtergrund för de Geschicht,
de hier vertellt ward.
|