Heirot un du lachst di kaputt
Kledoosch

vun Heinz Tiekötter

Kloor, miene Fro hett 'n goden Gesmack. Ansünsten harr se mi jo nich heiroot. Freuher harr se mol mit Mode un Inrichtungen to doon un doröber weet se ok goot Bescheed. Blots meent se jümmers, se alleen wüss, wat mi goot steiht un wat nich. Se seggt, dat weer beter, wenn ik mi dor man ganz op ehr verloten do, denn ik süllmst harr jo keen Gesmack. Sowat deiht di doch weh. Ik weet woll, dor hangt Soken in mien Klederschapp, de gefallt ehr nich. De heff ik vör twintig Johrn mit in de Ehe bröcht. To'n Bispeel miene Hawai-Hemden un de mehrsten vun mien Cord-Büxen un de Ringelsocken. Wenn ik düsse Soken ut'n Schapp hool, sett se sik 'n Sünnenbrill op de Nees, so as harr se bang vör de Farben. Af un an gifft dat denn ok mol Striet.

Orrig in'ne Wull kriegt wi uns, wenn wi verreisen wüllt. Veertein Doog bevör dat öberhaupt losgeiht, fangt miene Fro all dat Packen an. Se froogt mi denn, wat ik op de Reis antrecken will. Veertein Doog bevör dat los geiht, dat is mi veel to freuh, üm sik mit so'n Thema to befoten. Un so segg ik jedetmol: "Du, dat weet ik doch hüüt noch nich, wi weet doch noch gornich, wat förn Weder wi kriegt". Un denn schimpt se jümmers: "Denn pack man diene Soken alleen." Ik wurr dat ok moken; man ik mach keen Kuffers packen. Un ik weet jo genau, se hett mien' List al lang fardig.

Wenn ik ehr denn ober segg, se sall man miene greune Cordbüx nich vergeten, de will ik bi'n Wannern antrecken, denn hollt se mi glieks 'n Vördrag öber perseunlichen Schick un öber modischen Smack. Un se seggt, dat se nienich mit mi in Urlaub fohrn ward, wenn ik düsse utbuulte Büx anheff. Denn is dat beter, wenn ik alleen fohr. Düsse büdelige Cordbüx langt grod noch, üm dormit in'n Keller Brikett optostopeln. Dor bi heff ik siet twee Johr keen greune Cordbüx mehr. De is lang utrangiert. Ik wull doch blots mol sehn, of se jümmers noch düssen Snappatem kriggt, wenn se sik so opreegt. Ik weet jo genau, wat se in Wallung bringt.

To welkeen Promi höört denn düt Kostüm?!

Un wenn ik süllmst mol in Fohrt koom —ik meen, ik bliev jo souverän, bruk mienen männlichen Verstand un argumentier blots sachlich —, denn tell ik mol kott op, woans de Promis all vun wieden to erkennen sünd. Ik meen de Lüüd mit so'n echte Bedüdung.
"Stell di mol Günther Grass vör ohne siene Piep un ohne siene utbuulten Büxen! Oder Hans Olav Henkel ohne dat Cordjäcker, dat he vun Richard Germer arft hett. Alexander Gauland harrn se jüngs ok nich wählt, wenn he nich jümmers düsse Tweed-Jäcker vun sien Vadder an harr. Un de Hunnen-Krawatte! Or gläuvst du, dat uns Angela Merkel ohne ehre Bolero-Jäckchen 'n Weddererkennungsweert hett? Denn seh se doch nich anners ut as Fro Puvogel ut 'n drütten Stock."

Nützen deit mi düsse Opwand an Logik nich. Se snackt fixer as ik, sabbelt mi an de Wand un is mi bi'n Strieden öber. Ik geev op un maak düssen Tosomenprall vun mien männlichen Verstand un ehre weibliche Strietlust en End un verswinnd in mien Hobbykeller. Denn ünnerholl ik mi doch lebber mit 'n Buddl Beer.

Af un an stell ik fast, dat mi Soken fehlt. Denn krieg ik so'n Ahnimus, dat dor wedder 'n frömden Keerl mit 'n Büx or 'n Jäcker vun mi rümlöppt. De ward bestümmt vun siene Frünn'n froogt, woans dat an liggt, dat he jümmers so elegant antrocken is.

Tweemol in Johr verreist miene Hübsche mit ehr beste Fründin Christa för veertein Doog. In Freuhjohr geiht dat an de Algarve un in Harvst no Lugano. Denn kümmt de Tiet, wo ik richtig opbleuh: Eerstmol befree ik denn all de Klamotten, de se nich lieden mach un an de ik so hang, ut de Dunkelhaft. Dat sünd för mi jo doch Erinnerungsstücke. Un denn treck ik mi an, as ik dat lieden mag. Grood so as hüüt.

Nu segg doch mol ganz ehrlich: Wo findst du denn nu miene burgunderrode Büx mit dat gele Hemd un de witten Socken? Harmoniert de nich prachtvull mit miene Birkenstock-Sandolen? Wat bin ik doch för'n stootschen Kerl, ne? Maakst mi lieden?

Also ganz ahn wat an mag mien Fru mi ok...

Tipp: In de ersten fiefuntwintig Johr süsst du ohne Kleedung beter ut. In de neegsten tein Johr is dat egool. Dorno lettst du dien Tüüg beter an.