Wat is dat? Egal, her dormit!

Eten steiht in Keuhlschapp

vun Heinz Tiekötter

Wenn ik üm Meddernacht vun'n Skootobend no Huus kümm, knurrt mien Mogen as bi so'n Bessenbinner. So'n Kohldamp heff ik denn jedetmol. Op de Deel flüggt de Jack an Hoken; kott heurn, wat dat ok still is in't Huus un of allns slöppt — un denn op Teunspitzen ran an'n Keuhlschapp. Man, dat segg ik di, no so'n Obend kunn ik 'n Ossen opfreten. Beer un Kööm moookt doch bannig hungrig. Dat heet, in de leste Tiet prööv ik allens gründlich, bevör ik mi nu an dat delektier, wat ik dor in't Schapp finn.

Günter harr mi dat nich vertellen dröfft, wat em annerlest in sien Dunas passiert is: Dat weer teemlich loot worrn, as he ut de Kööminsel keem. He weer flau dörch sien Hunger, un de Büchs mit Corned Beef, de he in'n Keuhlschapp funn'n, keem grod goot to pass. Se weer all anbroken, un de Deckel stunn op. Siene Modder harr de Büchs in'ne Plastikfolie wickelt un dat weer ok goot so. Günter harr se gornich opmoken kunnt.

Wat dat is? Egal, ik eet dat!

Anner'n Morgen bi'n Freuhstück in de Köök — se freuhstückt jümmers tosomen, Modder, Günter un Kuddel, de Dackel — freug sien Modder, wat he denn güstern Obend den Hund noch Foder geben hett. Se kunn de Büchs mit dat Schappi nich finnen. Slagordig güng Günter en Sepensieder op. För em full dat Freuhstück düssen Dag ut. He weer mit'n mol nich mehr hungrig!

As ik dat uns Fründin Heike vertellt heff, meen se, sowat harr se mit ehren Robert ok all beleevt: He keem ok merrn in'ne Nacht an Loden, harr Kohldamp un hett 'ne grote Schöttel mit Quark in Keuhlschapp funnen. De hett he wegneiht. Öber den ganzen Dag henweg harr Robert so'n Opsteuten un em weer nich goot. Heike hett em opkläärt: Se harr sik an Obend vörher en Gesichtsmaske ut Honnig, Gurkenschieven un düssen Quark tosomen mixt. De weer nich to finnen, as se sik an neegsten Dag düssen Geheemtipp gegen de Folden opdregen wull.

Dat smeckt ok Wuffi beter as Schappi!

Mien Modder hett jümmers seggt, een, de för dottig Mark supen kann, de mutt ok noch en Doler för'ne Knackwust in de Tasch hebben.
Man mit 'ne Knackwust, dor kannst doch nich veel mit anfangen! Denn muss tohuus jo eerstmol an't Keuhlschapp gohn.