Beste Frünnen

vun Heinz Tiekötter


Mit Jonni heff ik op de Veddel in een Treppenhuus wohnt. Wi hebbt tosomen speelt un sünd in de sülbige Schoolklass gohn. Wi weern beste Frünnen. Beid wulln wi Tallymann warrn, jüst so as Willi, de öllere Broder vun Jonni. Denn is Jonni eenmol backen bleben un dormit güng de Lehrstell as Tallymann fleuten. Jonni hett denn Quartiersmann lehrt, un wenn de Kollegen in siene Lehrfirma nich so sopen harrn, denn weer ut em ganz bestümmt 'n fixen Quartiersmann worrn. Obers so hett he sik mit siene Arbeitskollegen un nu beste Frünnen mehr in de Kneipen op St.Pauli rümdreben. Dor hett he ehrder den harten Hund speelt — Knööf harr he jo genoog — as dat he no Arbeit gohn is. Nodem he dor mol 'n düchtiget Moorsvull kregen hett, denn siene besten Frünnen sünd utneiht, trock Jonni nu in St.Georg mit liederliche Deerns dörch de Kneipen. Jonni is jümmers wieder afrutscht. An Enn hest du de Strotensied wesselt, wenn du em rechttiedig sehn hest.

Denn is he op St.Georg woll to bekannt worrn orrer de Kiez weer em to lütt. Jonni is ümtrocken no Berlin. Ik heff noch heurt, dat he sik dor anfangs fungen harr, nodem he de Dochter vun en Kröger kennenliernt hett. Bi ehr stunn Jonni achtern Tresen un nächtens leeg he in ehre Puuch. Bi de Gäst harr he Ansehn. He kunn jo ut den Hamborger Hoben 'n Barg vertellen. Man ok Berlin hett'n Ünnerwelt un de weer för Jonni magnetisch. Dat trock em mehr un mehr dorhen. Dat duer nich lang un Jonni harr Striet mit een vun de Gangs op'n Kiez. Em hett dat nix nützt, dat he veel Knööf harr un fix haun kunn; de annern weern mehr Lüüd un em öber un hebbt em to Schannen haut. Se hebbt versproken, dat se em afsteken würrn, wenn se em nochmol drepen. Denn much ok sien Deern em nich mehr lieden un dat hett nich lang duert un uns Jonni hett mit ne'e, nu beste Frünnen ünner de Spreebrücken slopen. Kontakt no Huus un to sien Öllern un sienen groten Broder Willi geev dat all lang nich mehr. He hett sik wull to dull schoomt, so as he nu utsehn däe.

Dat is veer Johr her, as de grote Broder, de intwüschen to Wohlstand komen weer, Post ut Berlin in sien Breefkasten funn. Op schietiget, knitteriget Papier stunn in krickelige Schrift un mit'n Barg Fehlers in, dat de Afsenners de besten Frünn vun Jonni west sünd un dat se Willi ehr Bileed utspreken wulln. Jonni weer storben. Willi müss ober nich no Berlin komen; se wurrn sik üm allens kümmern. He sull jem man dusend Euro för dat Begräffnis schicken. Den Rest wulln se denn schon alleen moken. Se ward sik kümmern. Jonni is jo jemmer beste Fründ west.

Ünnerschreben harrn fief Mann. Willi hett lang nodacht un denn de dusend Euro no Berlin send un achteran den Breef wegsmeten. Dullen Kummer harr he nich. För em weer sien Broder all siet Johrn doot.

Un nu pass op: Düt Johr, kott vör Wiehnachen, kreeg Willi Post vun en Berliner Krankenhuus. In dat amtliche Schrieben stunn, dat sien Broder Jonni vör vertein Doog storben is un jem vörher düsse Adress angeben harr. Dat Hospitol deelt mit, dat Jonni anonym ünner de Eer komen is. De Kosten sünd vun de Stadt Berlin öbernomen worrn.


11.12.2016


na baven