Ne putzige Geschichte...

... aber wahr, vertellt van Karl-Otto Dohrendorf üt'n Papendieke (Papendieker Platt)

Var enige Weeken harre ick in Brönswiek tau daun. Wie ick nu sau gegen Abend mit mienen Geschäften tau Wege was, bummele ick den Hutfiltern runner, stelle mick hinner dat grote Schaufenster von de "Braunschweiger Zeitung", um tau seihn, wat sick inner Weltgeschichte tauedragen harre. Wie ick nu mit Lesen fertig was, ging ick langsam in Richtung Kohlmarkt tau.
(Nu mutt ick noch wat seggen. Ick harre mick trotz de warme Sömmertied mächtig verküllt.)

Brönswiek, Brunnen an'n Kohlmarkt

Ick kreeg also saun bannig Husteschür un wie dat denn so is, mott ick darbi ütspien. Da ick nu aber as anständigen Minschen nich op den Bürgerstieg spien woll, böge ick mick na links un will in de Stratengote spien. In denselben Ogenblicke drängelt sick son niedlich "Schoßhünnecken" an mick varbi un ick spie düsen lüttschen Hund int rechte Oge. "Ih, saun dummen Teben", segge ick sau var mick hen, aber ick harre dat Wort noch nich ütesegget, da fänget sune fiene Dame, de den Hund an Stricke harre, all an tau schrien: "Oh, mein armes Hündchen! Wie können Sie flegelhafter Mensch meinen kleinen Fifi so beschmutzen, igittigittigitt! Sofort machen Sie den Hund wieder sauber! Putzen Sie das ab!"

Da ick nu tiemlich groot bin, dat Früensminsche aber von originäre Grötte was, keik ick sei von boben bett unne an un sä: "Wo sind Sei egentlich nar Schaule gahn? Sei sind her wohl tauetrecket? 'ne Brönswieker Dame schient Sei nicht to wesen, sünst könnse nich so schrien wie'n Stratenwief. Kann ick denne davar, wenn öhre Fifi just dahen leppt, wo ick hen spie?" Nu kamm düsse Dame ganz in Rage un schrie over de ganze Strate, dat sick im Nu 'n Stratenopluf mit drei Parteien bille, den ene var den Hund, de tweite var de Früe un de wenigsten aber far mick. Da ick nun glöbe, dat jeden Ogenblick 'n Schupo komen könne, de mick midde nar Wachen nehmen die, mick aber ok de Hund leid dä, de immer mit'n Koppe schöe, um dat ungewohnte Hindernis lostauweren, woll ick gerade mien Taschendäuk rütkriegen un den Hund putzen, höre ick, wie de Dame herütschrie: "Sie alter dummer Bauer, wenn Sie nicht wissen, wie Sie sich in der Stadt benehmen müssen, dann bleiben Sie gefälligst auf Ihrem Misthaufen!" Da fungen de ganzen Lie an to lachen un mick steeg denn doch saun betschen de Krimmel op.

"Madameken, Sei schien gar nich to weten, dat Se weder sick noch Öhren Teben futtern können, wenn de dummen Büren met ehren Messhucken nich wären!"
In mienen Arger namm ick nu mienen Handstock, um den Hund dat Hindernis wegtaunehmen. Wie de Früenminschen dat nu aber seihet, dreiet se ganz dörch.
"Was, mit Ihrem Bauernknüppel wollen Sie meinem armen Fifi zu Leibe gehen? Nehmen Sie Papier, denn ein Taschentuch scheinen Sie ja nicht zu haben, Sie Barbar!"

Da nu weer alles an to lachen fung un ok en paar Marktfrüens datauekomen wern, was eine Früe so fründlich un gaw mick en Bogen Seidenpapier un damidde hebbe ick den Hund sauber emaket. Aber inne Straten von Brönswiek spie'e ick mien Leven nich mehr.