Hüttbleek

vun Heinz Tiekötter

Holger un Ulla hebbt sik 'n richtiget Blockhuus boen loten. So een vun de Sort, as de in Kanada un Skandinovien stoht. Un merrn in de Prärie stunn dat Huus vun Ulla un Holger ok. Oder will mi een vertellen, dat Hüttbleek nich merrn in de Prärie liggt.

Wi schreben dat Johr 1968 un Holger weer de Eerste in uns Krink, de öberhaupt doran dacht hett, sik en egen Huus to buen. Dat mehrste hett he süllmst mookt. To dat Richtfest weer'n wi inlood.

Kennst du di in de Prärie ut? No Hüttbleek müsst eerstmol henkomen. Ik heff mi de Strotenkoort ankeken, denn een Navi geev dat domols noch nich. Dat weer noch nich erfunnen. Op de Koort heff ik sehn, dat de beste Weg vun Blanknees no Hüttbleek öber de Autobohn un denn wieder öber Kaltenkirchen, Oersdorf un Kattendorf güng. Falsch moken kunnst dor egentlich nich veel. Heff ik dacht. — Dat ännert sik, wenn du diene Strotenkoort tohuus vergeten hest.

Denn steihst du schnell mol op'n Proppen. In Kattendorf wüss ik nich wieder. Ik brems un steeg ut, as ik op de anner Strotensiet en ollerhaftigen Mann sehn heff. Ik heff em op Hoochdüütsch froogt, wat he mi den Weg no Hüttbleek wiesen kunn. He verstunn mi nich. Merrn in de Prärie kümmst du beter mit Plattdüütsch torecht. Richtig; as ik em nochmol op Platt froog, klapp ok de Verstännigung. Man nützt hett mi dat liekers nich veel. Vun Hüttbleek wüss he nix, dorvun harr he noch ninich wat heurt. Ik gläuv, he hett jümmmers de Zivilisaschoon jümmers in'n Westen söcht; denn dor leeg Kaltenkirchen. Helpen kunn he mi nich. Also eersmol noch wieder rin in de Wildnis. Wi weern noch kene dree Kilometer fohrt, dor stunn an de rechte Strotensiet en Ortsingangsschild mit "Hüttbleek"! Ik dach bi mi: "Kiek an, vun'n Osten hett de Ool ok nix holl'n."

In düsse Wildnis pass Holger sien Blockhuus goot rin. Dat Huus bestunn ut dicke Balken, lütte Finster un weer urgemütlich. So as de Trappers harr Holger sik en open Füerstell ut dicke Feldsteen buut. Keekst du dor lang noog in't Füer rin un harrst all 'n beten Beer un Whisky in de Figur, denn kunnst di licht inbillen, du weerst süllmst 'n Trapper. Man Indioners heff ik ober nich dropen.