Hochtietsreis

vun Silke Frakstein

Wi goht nu op Hochtietsreis.
Jaaa, dor sünd Ji platt? In uns Öller. — Grod in uns Öller!

Wi sünd nu 60 Johr verheiraadt.

60 Johr is en lange Tiet, wenn man dat vor sik liggen süht.
60 Johr is en kotte Spann, wenn man dat kiekt vun achtern an.

De Gedanken goht trüch. Wat hebbt wi allens beelevt... Un wi un wo hebbt wi de sworen Tieden wuppt. Un wat hett sik allens verännert in düsse Tiet!

De Glotze? Pah! Hüüt kümmt KI!

An eerste Steed steiht de Technik. Keen Waschmaschien, Spöölmaschien, ha, dat weern wi sülven!
De Glotze keem. Na, un so wieder un so wieder.

Wi hebbt uns de Johrsbeuker vun unsen Johrgang köfft un dor kunnen wi nochmol lesen, wat wi harrn un wat nich. Dorbi heff ik mi so dacht, wat vun den ganzen Kroom, denn du hüüt so moken kannst, wörr ik mitmoken? 

Wi hebbt Internet, Email, Websiet, Whats App. Bi de Bank sünd wi uns egen Beroter. Ober denn? Wi bruukt dree Schruven, mehr nich – gifft dat nich mehr. Blots noch över dat Internet – 50 Stück. Strom, Waschmaschien, allens över dat Internet.
Wi hebbt villicht so an de 30 Passwörter. Allens op Papier.

Un wenn di de Post wat tostüert, rödelt de Laberknoken den ganzen Dag bit to de letzte Meldung: Ihr Paket konnte heute leider nicht zugestellt werden!! Un jeedeen, de sik för wichtig höllt, is op Instagram to finnen un vertellt Soken, dor blifft mi de Luft weg.

Gräsig un gefährlich is Tik Tok — un uns Olaf is dor nu ok to finnen.

Dat Allerletzte sünd de Influencerinnen. De hampelt 24 Stünnen vör un mit den Laberknoken rüm un vertellt vun Soken, de wi nicht bruukt. Un verdeent dor ok noch bannig veel Geld mit.
Wat wi bruukt, sünd Kontakte – live. Mitn’anner snacken. Un för de Kinner mehr Warms un Tiet vun de Öllern. Mutt dat denn würklich 2 orr 3 Mol in’t Johr Urlaub sien? Twee Autos?

Jo, wi sünd olt un freit uns över veele lütte Soken. Goht mol wedder enen Schritt trüch. Nich: Weniger Arbeit, mehr Freizeit, mehr Geld. Wat mookt Ji in 60 Johren?
In de Scholen mööt de Kinner an’n Nomiddag „bespaßt“ warden.
Kottens hett mol en Schoolmeester de Kinner froogt: „Wollt Ihr nich lieber nach Hause, um euer Kinderzimmer kennen zu lernen?“ Dat geiht nich. De Kinner kennt den Weg to Foot nich, uterdem is nüms to Huus.

De letzte Meldung in’t Blatt: Azubis köönt bi de Bewerbung nich reken un schrieven.

Na, wi fohrt nu eerstmol op Hochtietsreis. Mit’n Bus, in Düütschland. För mi gifft dat de niege Smartwatch. Un för Schietbüdel de sieden Spitzenunnerbüx, in rot, ut Japan.

Adschüs!