Meist ümsünst vun Heinz Tiekötter Wi sünd 'n Volk vun Sammlers un Jägers; dat liggt uns Natur. Wat wi seht un bruken köönt, dat wüllt wi hebben. Männichmol froogst du di achteran, wat dat ok neudig weer. Dorvun leeg jo all soveel in'n Schapp. Herrmann Drews liggt mit'n Beenbruch in'n Krankenhuus. He is operiert worrn. Se hebbt dat Been mit'n iesern Gerüst. Dat Been sütt nu ut as'n Pieler vun de Rader Hoochbrück. Bi em an't Bett sitt sien Sangesbroder Hinnerk Thiessen un snackt em Troost to. As Hinnerk "Adschüüs" seggen will, hett Herrmann noch 'n Anliggen: Hinnerk sall bi em to Huus no'n Rechten kieken, sall sienen Wogen in de Garoosch fohrn un em bi sienen neegsten Beseuk veer frische Oberhemden mitbringen. De find he in de Sloopstuuv in'n linken Kleederschapp ganz boben. Hinnerk kreeg 'n Slötel un versprook Herrmann, dat he allens beschicken wöör. Denn mook Hinnerk sik op'n Patt. Dat mit dat Auto harr Hinnerk gau kloor. As he ober vör dat Kleederschapp stunn un de Döör open mook, rutschten em vun de beiden Borde en Swung Herrenhemden vör de Feut. Dor boben legen wisslich an de dottig Hemden. All all weern se nee un noch verpackt un kemen ut de Fabrik vun "Warmborg". As Hinnerk nomeddags trüch in dat Hospitool kümmt un bi
sienen Fründ sitt, froogt he Herrmann, wat de mit all de neen
Hemden vörhett? "Segg mol, büst du bi'n Herrenutstatter
instegen?" Annerlest kreeg Hinnerk vun Herrmann tein scheune Hemden schenkt. Herrmann hett den Platz in sien Schapp bruukt, denn dat geev wedder 'ne Akschoon bi "Warmborg"! 3.5.2020
|