vun Behrend Böckmann

Weiten's wat dat is, Hellowienkees? Ne, ik wüsst dat ok nich un heff mi ut luder Niegelichkeit son'n Keesstück neeger bekäken. Un süh dor, hei is nich blot in körbsenfarwig Popier inschlågen, sonnern Körbsenkierns lüchten œwerall up't Popier näben dei nödigen Informatschonen. Un so as 'n süss Kümmel- un gräune Päperküürns in'n Kees finnen kann, sünd dat nu lütt hackt Körbsenküürns, dei den Hellowienkees eigen sünd un dat Geschäft beläben sallen.

Œwer nich blot Hellowien is taun Geschäft worden, ne, ok dei Reformatschon, dei ja mit Helloween up den glieken Dach föllt. Nå dei Luther-Wür' "Bier gägen den Döst, Brot gägen den Hunger un Christus gägen den Dod" un "Ät, wat gor is, drink, wat klor is, schnack, wat wohr is" hemm' äbenso klauke Koplüd dat Luthersche Reformatschonspils, Luther-Porter, Luther-Starkbier un Luther Urtyp in'n Hannel bröcht.

Nu fählt blot noch, dat dat Reformatschonspils mit 'n Hellowienkees in'n Geschenkketong an'n Mann bröcht ward. Œwer dor warden sik ok Plietsche finnen, dei as Start-up-Ünnernähmer in'n "Coworking-Büro" dissen körbsenfarwigen Ketong erfinnen, in weckern Heiden un Christen mit Kees un Bier tau glieken Deilen hübsch verpackt gaude Frünn upluern.

Up Hellowien tau

Wat is dat hüt an'n Häben gris!
Un von dor båben kåmen lies
För mi würklich ungelägen
Lütte Druppen fienster Rägen.

Ik wull doch up den Acker gåhn,
Wo einer hett sien Körbsen ståhn.
Möt up Petrussen vertruugen
För dat Grugelkörbsenbuugen.

So sachtens ward dat buten hell,
Af tau den Körbsenacker schnell:
Deit dei Sünn' ok noch nich schienen,
Liekers gäle Körbsen grienen!

Doch weckern Körbsen nähm ik blot?
Dei ein tau lütt un dei tau grot!
Doch bald heff denn einen funnen,
Ik betåhl un bün verschwunnen.

Tau Hus nähm ik den Körbsen ut
Un schnie em Ogen, Näs un Schnut.
Nå sien Utseihn deit mi düchten:
Hei ward gaut as Späukel lüchten!