Uns Fründin

vun Anke Nissen


Truurfier in uns groot olle Kirch. Uns Fründin sull to Graff bröcht warrn. Vele Truurgäst weern kamen. En Posaunenbläser hett vun de Empore dal blaast. Wi hebbt sungen un de Pastor hett ut dat Leven vun uns Fründin vertellt, mehrst vun ehr as Ehefru. Man uns Fründin weer natürlich veel mehr — se weer uns Fründin.

Ik denk, dat ik villicht de Minsch bün, de uns Fründin an'n allerlängsten kennen deit. Uns beiden Mudders weern befründt, uns Kinnerwagens hebbt neven'anner stahn, wenn wi dor in legen un strampeln. Mit söss Johr sünd wi tohoop to School kamen, mit 17 sünd wi tohoop ut de School kamen. Wi süngen in de sülvigen Chöre, stünnen bi' n Sport neven'nanner in de Reeg, spelen tosamen in' t in Krippenspeel, hebbt up de Feller mithulpen bi 't Kohlplanten, Rövenvertrecken, Kantüffelnsammeln...

Wi kregen beid — binah to lieke Tiet — einen lütten Broder. In 'n Sommer güngen wi tohoop an'n Strand to 'n Baden, öven so lang swömmen, bet wi dat kunnen, wi fiern elkeen Kinnergeburtsdag tosamen, wi sünd tohoop konfirmiert worrn.

Man wi weern nie sowat as "beste Fründinnen". Aver wi hebbt den Kontakt to'nanner uns Leven lang nich verloren. Wi schreven uns, besöchen uns ok mal. Jede vun uns hett ehr Leven in ehr Welt leevt. As för uns Fründin de Renten-Tiet anfüng, güng se up uns Insel trüch. Vun dor af hebbt wi uns wedder mehr sehn, hebbt mehr telefoniert, mehr Breve schreven.

Denn maken sik wuchern Zellen in uns Fründin breet. Se leeg toletzt up en richtig Smartenlager. Dat hett mi weh daan. Ik bün oft un oft henföhrt na ehr.

Man nu bün ik rein so 'n beten verlichtert, dat uns Fründin nich länger lieden mütt, obschoonst ——.
Een ut den Krink vun uns Frünnnen schreev:
"Uns Fründin fehlt mi so — ehr regelmäßig Anropen bi mi, de langen Snacks mit ehr..."


20.11.2016


na baven