Fautballdroom

vun Behrend Böckmann

Dor drömt doch uns lütt Heini,
Hei ward ok mål ein Schweini,
Kümmt denn üm dei ganze Welt,
Hett as Schweini ok väl Geld.
Fautball deit sik ümmer lohnen,
Heini drömt von väl Milljonen!

Fautball spälen inne Wüst,
Ünner Palmen an ein Küst,
In't Hochland, wo dei Luft is dünn,
Un wo man süss noch spälen künn —
Nie nich kost't dat eigen Geld,
Uns Heini dröömt sik dörch dei Welt!

Un in'n Drom wür ok probiert,
Woans man dit un dat markiert
Woans man up 'nen Späler springt,
Wenn hei dat tau'n Dur mål bringt,
Woans man sik so ornlich krümmt,
Wenn man denn tau Fall mål kümmt.

Woans man fuurts dei Arms hoch ritt
Wenn man sik up den Rasen schmitt,
Dat jeder süht, wat dor so steiht,
Woans dei grote Sponsor heit,
För weckern hei Reklame löppt,
Wenn Sport sik mit dei Wirtschaft dröppt!

Heini drömt so sien Geschicht
Von den Fautballünnericht.
Hei deit in'n Schlåp sik ganz dull quälen,
Bi't Fautballen Theoter spälen,
Un denn ward dat ümmer hiller,
Ümmer niege Fautballbiller:

Von den Inmarsch mit dei Lütten,
Nå den Sieg dat Champussprütten…
Hei fult noch eins up siene Oort,
Dei Schiri markt't, wiest em dei Kort.
Dorbi wull hei dat Allerbeste,
As alle reepen "Heini, feste!"

Hei drömt nu all 'n ganze Tiet,
Schmitt sik von ein up'e anner Sied;
Heini fünn dat würklich fien,
In Rio denn dorbi tau sien,
Un em keem ok tau Gehür,
Dat Özil sik bald auten wür!

Un lütt Heini löppt denn wedder
Œwer'n Råsen achter't Ledder,
Hei sett nu sien Ünnerschrift
Up dat Popier, wat man em gifft.
Wat ward sik sien Lopen lohnen!
Kriecht as Lahm ok teihn Milljonen!

Doch sien Freud höllt nich grot an,
Dor hei up eins nicks seihen kann —
Rok un Füer, un väl Gebrüll,
Dat is nich dat, wat Heini will.
Ut sien Puuch hüppt hei nu rut,
Sien Fautballdrom, dei is nu ut!