Villicht noch bekannt vun den Film ut dat Johr 1985.

Swatte Seel, griese Muus. Dat grönt so grön, wenn Spaniens Blöten...
Na, markst Müüs?
Farven hebbt en groot Bedüden, överall.
Fangt wi mit den "Blauen Moondag" an. Veele kennt Indigoblau. Bit de Farv richtig to sehn is, duert dat 'n Tiet. To'n Bispill dörch "Rasenbleiche". Wiel de Lüüd in de Tiet vun de Bleiche nix to doon harrn, is de Snack "Blau machen" dorbi rutsuert.

Un wo is dat mit Witt: Frisch fullen Snee deckt allens to. Dat is still. Feller un Wischen sünd warm un week todeckt.
De Bruut in Witt: Unschuld, Reinheit, na ja usw. Schall dat ok hüüt noch geben.

De griese Muus is överall.
Op de Wischen, in de Bohn: Husch, husch is se vörbi. Nüms hett ehr sehn orrer heuert.

Dor is Rot doch ganz wat anners.
Dat sticht in de Oogen. Hallo, dor bün ik. Carmen harr en root Kleed an. Un mit'n roden Anorak op de Skipiste hett jeedeen di in't Oog.

Un nu Lila, der letzte Versuch.
Ut Kohle kunn man Farv kriegen. Bi de Oxidation vun Steinkohleteer gifft dat Anilin = en purpurvioletten Farbstoff.

Rosa/Pink — dat's dat Ding!
De lütten Deerns mit ehren Fimmel. Allens in Rosa/Pink, dat mutt sien. Dor flimmern di meist de Oogen.
Un wat is mit de ölleren Deerns? To de griesen/silbern Hoor passt Pink wunnerbor.
Dat is de Menen vun Miss Piggy ok. Dat peppt op un mookt frische Backen, äh, Wangen.

Un denn Geel: Fohr mol to de Rapsblüte dörch Schläfrig-Holzbein. Genuss pur.

In'n Sommer, wenn de Feller in Greun stoht, hett dat wat vun Ruhe.
Un an'n Obend nich in de Buntkarierten, nee, Hellblau. Dat nimmt de Hitten.

Mit Swatt heff ik af un an Probleme.
Swatte Kledoosch kann bannig schick sien.
Ober Swatt in de Sloopstuuv? Wat mookt de dor?
Orrer in de Köök? Heff ik ok al sehn. Dorto noch witte Kacheln. Dor schall ik Middageeten moken? Ik denk dorbi jümmers blots an Schachfiguren.
Gräsig, bannig gräsig is Swatt, nee, nich op Gräffnis, nee, bi de Radfohrer. De Mountainbiker kümmt ut de Firma un den ganzen Stress strampelt se sik af. Is gesund, kloor, heff ik freuher ok mookt. Ober mutt de Kledoosch swatt sien, in'n Winter un denn noch ohn Licht? Na, se hebbt jo enen Helm op.

So bunt is de Welt.

Un nu de Katastrophe: Uns Köök is sünnengeel, mit'n lütt beten Bruun so hier un dor.
Un wat bringt Schietbüdel vun'n Inkoop mit? Faatdook in Pink. In Pink!!
Oh nee, wat mook ik nu?
Kann Een vun de Lesers villicht pinkfarben Wischlappen bruken?