En Angeliter vertellt:
Op Fohrrad ümstiegen

Ik schull man beter dat Auto stahn laten un mi op't Fohrrad setten, kreeg ik hier un dor mit op de Reis, wenn ik in mien Benzinkutsch instiegen wull. Op Deenstfohrten harr ik keen Problem mit disse klooken Tipps vun anner Lüüd, ik heff eenfach nich henhört. In Bürotüüg bi Wind un Wedder sik op Rad afstrampeln un sik achteran vermarst un bavento villicht sogor in wat schietige Klamotten mit Lüüd drapen, dat weer wull nix.

So nette Lüüd op Fohrrad!

Aver as ik nu Panschoneer wurr, dor sehg dat för mi denn doch wat anners ut. Wenn ik nu bi warme Sünnschien in mien Blechkist dörch dat schöne Angeln keem un dorbi bekannte Lüüd op Fohrrad möten dee, denn wurr ik rein wat afgünstig.

Dor schull nu Enn op warrn, ik wull mi en Fohrrad koopen. Mien Fru freue sik. Se dache foorts an Radtuurn, de wi denn jo wiss tohoop maken deen. Aver ehr weer ok glieks Twievel antomarken. Weer jo ewige Tieden her, dat ik mi op Fohrrad afstrampelt harr. Villicht fehle mi nu de Puust bi dat. De Straaten hier bi uns in Angeln sind jo nich överall schier as so'n Plättbrett.

Ach wat, ik bin poor Daag later na en Fohrradladen bi uns in't Dörp stevelt un vertelle, wat ik mi nu vörnahm harr. Nix eenfacher as dat, kreeg ik glieks to weten. Fohrröder geev dat in alle Utföhrungs un Prieslagen, dor kunn ik sachs ok en Veloziped för mi passend mank utkriegen. So wurr mi denn vörstellt, wat hüüttodaags op dat dore Rebeet to kriegen is. Lange Reeg vun nagelnüe Röder in alle Farven un Grötten weer oprangscheert. "Treckingbeik" weer wull anseggt, meene de Verköper, as dat üm Technik un Utsehn gung. Doch nich man so'n gewöhnliche Koor as in verleden Tieden un sogor noch ohne Gangschaltung! Ünner fief Gänge weer nix, achteihn oder mehr as twintig dorvun ok keen Seltenheit. Wat sünst noch an so'n neemoodsche Rad bimmelt un bammelt, kreeg ik bi de Enn nich allns mit. Wenig weer't nich!

Fief Gänge is Minimum!

As ik nu denn aver weten wull, ob dat nich ok so ganz gewöhnliche Scheesen geev, man blots so mit billige Fellig, eenfache Frieloop un Handbrems, dor wurr de Utwahl örnlich wat lütter. Ik harr bi dat noch mien Fohrrad in'e Kopp, wat ik mi in mien Lehrtiet mal köfft harr; afstottert do vun mien fiefundörtig Mark Stiftlohn alle veer Weken. Wat weer ik krötig to domalige Tieden, wenn ik mit dat blankwienerte Prachtstück Marke Göricke dörch de Gegend surren kunn. Weer veel an to putzen, liekers keem ik gegen Rust un Schiet op Duur nich an. Dorüm is de utleierte Kist ok vör wecke Johren bi de Plünnkeerl lannet.

So weern Fohrrööd fröher

Würklich ganz nette Lüüd op Fohrrad!

So'n enkelte billige Koor kreeg ik mi nu ok bi unse Fohrradladen utsammelt. Weer nich half so düür as all de annere Röder, aver dat lange wull för mi, dache ik. "Mutt aver veel putzt un plegt warrn", kreeg ik vun de Verköper noch mit, sünst weer de Staat bald vörbi, kreeg ik wohrschuens noch mit. Mientwegen ok dat.

Nu denn op eerste Tuur mit dat blitzblanke nüe Rad. Mien Fru karjohl flott vörut, ok ohne Gangschaltung. Ik müsse mitünner bannig strampeln, üm bi dat Tempo mittohooln. Villicht weer för mi so'n Schalter doch nich ganz ring wesen. Harrn jo nich glieks twintig oder noch mehr Gänge sien brukt. De eerste teihn Kilometer heff ik mi bannig to mien nüe Rad un to unse schöne Landschop freut, de ik nu ganz anners wies wurr. Mit Auto weer ik dor man jümmer so dörchbrust, nu kreeg ik rechts un links veel mehr to sehn.

Aver denn harr ik mien Achtersteven op de nüe Saddel rieklich dörchwalkt, de schöne Gegend weer mi so bilütten teemlich eenerlei üm. In de Beens marke ik nu ok, dat ik keen Motor-PS ünner de Fööt harr. So'n Gaspedal is lichter op to pedden as op Fohrradpedals.

Schön is dat mit so'n Rad, man deit jo ok noch wat för de Ümwelt. Aver de Ünnerscheed to fröher is mi nu düütlich wurrn un hett nich alleen mit de Luxus-Röder vun hüüt to doon: As junge Keerl weer ik stüttig ünnerwegs op Rad, harr knapp Tiet un ok nich recht Lust, dat Prachtstück noch veel to putzen. Hüüt putz ik geern mal wat länger, wenn ik denn man vun wat längere Radtuurn verschont bliev.