Eierkarton

Tau'n Anhören hier klicken:

Lesen deit Anke Nissen in fehmaraner Platt.

Ik weer noch lütt, güng noch nich to School, dor nehmen mien Öllern mi mal mit na Lübeck. Wat för en upregen Saak! Bet nu weer ik höchstens mal bet na Heiligenhafen verreist, na Tante Anna. Man nu sull dat bet na Lübeck gahn!

Morgens fröh föhren wi mit de Inselbahn bet Fehmarnsund, denn mit 't Schipp röver na de anner Siet, denn mit de Iesenbahn bet Lütjenbro. Dor müssen wi ümstiegen in den Tog, de vun Heiligenhafen keem un bet Niestadt föhr. In Niestadt sünd wi denn wedder ümstegen, ditmal in den Tog na Lübeck.

Ik weer al mööd vun dat vele Iesenbahnföhren un dat vele Utkieken, as wi in Lübeck ankemen. Un wat heff ik staunt över de velen Minschen, de dat hier geev! Un all lepen gau hierhen un dorhen. Un up de Straat rumpel en Stratenbahn. Un as wi in en Koophuus kemen, kunn ik rein gor nix mehr sehn. För mi weer dat allens to veel. An'n End hebbt mien Öllern mi enen tehmlich groten Karton in de Hand drückt, den sull ik dregen. Vörsichtig dregen; denn dor weern Eier binnen. Na goot, ik heff de Upgaav övernahmen un pass nu fein up, up den Eierkarton.

As dat nu wedder na Huus gahn sull, müssen wi ja eerstmal na den Lübecker Bahnhoff. Wedder vele Lüüd, richtig Gewöhl, man wi hebbt den richtigen Tog funnen un föhren nu de lange Streck wedder trüch. De Lüüd in uns Afdeel de fragen mi:
"Wat hest du denn dor in den Karton?" Un ik sä: "Eier!"

Mien Mudder, de fluuster nu mit de Lüüd un de lachen denn un keken mi an un sään, ik sull man jo goot uppassen up de Eier. Dat wedderhaal sik, as wi in Niestadt in den annern Tog ümstegen weern un in Lütjenbro denn ok wedder.

Hannelore

Hilligavend kreeg ik en Popp vun 'n Wiehnachtsmann, mien Hannelore. Un wedder fluuster uns Mudder. Ditmal mit Grootvadder. Un ok de lach liesen un keek mi an.

"Wat hett se di vertellt, Opa?" He blinzel so 'n beten verbiestert na mien Mudder hen, man de güng graad rut in de Köök.

Ik stünn vör Opa un tööv — he nehm mien Hand, straak dor beten röver un sä toletzt: "Se hett mi vertellt, dat du al heel düchtig den Wiehnachtsmann holpen hest; denn du hest de Popp sülms vun Lübeck bet hier na Huus dragen. Se leeg in den Eierkarton."