Bi 'n Dokter

vun Behrend Böckmann

Wat is dei Töwstuf proppenvull!
All hausten, pruschen weit wi dull,
Mannslüd, Frugens un nich minner
töben ok por kranke Kinner.

Un mank dei Ollen spält 'n Racker
mit sienen niegen Ackerschnacker,
denn dei Nikolaus em wull bröcht
mit denn dei Lütt sien Glück versöcht.

Hei fråcht nu an bi'n Wihnachtsmann,
ob hei 'n Läpptopp bringen kann,
'n Kinnerläpptopp künn't ok sien
so as't ok gifft den Kinnerwien.

Dunn reep dei Schwester sienen Nåmen,
taun Dokter süll hei rinnerkåmen
un ward utfråcht, wat em so quält,
hei œwerlecht, wat em wull fählt.

Hei kiekt den Dokter an un lacht
un secht tau em: "Ik heff mi dacht,
wenn ik 'n Kinner-Läpptopp kreech,
wier ik bald wedder gaut tauwech."