Hüüttodaags kannst di up Straaten
bi Autofohrten knipsen laten.
Bald lögenhaftig to vertelln,
mit'n Auto kannst'n Bild bestelln,
musst bloß goot Tempo kriegen, kräftig.
Tominsten aber öber föfftig.
Man pett dat Gaspedol
mol beten duller daal.
Dat geiht besunners goot
mit'n rechten Foot.
Man süht dat, wenn dat blitzt,
denn hebbt se di all knipst.
Hett klappt, denn is de Fall woll ritzt,
denn makt dat Apparatgerät
automatisch so'n Porträt.
Dat ward di schickt, dat brukst nich haaln.
Dat is bequem, brukst bloß betahln.
Wenn allnes richtig funktioniert,
ward dat uck noch goot punktiert.

Man finnt veel Gelegenheit,
wo man dat mol knipsen geiht.
Mien Album is all tämlich vull.
Wiel ick noch mehr nich hebben wull,
bruk ick nich noch mol so'n Bild
un föhr nich mehr ganz so wild.
Wullt di keen Bild mehr schicken laten,
mußt langsam föhrn up veele Straaten.

Ick dach, wenn mol so'n Blitzer sühst.
is beter, wenn em fründlich grüßt.

Dat heff ick denn uck jümmer daan.
Een Blitzer hett dat nich verstahn.
Ick föhr langsam an vörbi,
doch mitmal, dor knipst de mi!

Ick heff dacht, dor stimmt wat nich.
Nu föhr ick mol woller trüch,
aber düt mol grüß ick nich,
dat is mi nu ganz egol.
Dor blitzt de mi glieks nochmol,
so dat ick mi dinken mutt:
De Blitzknipskassen is kaputt,
wiel de doch marken schull,
dat ick nix vun em hebben wull.

Dat wör richtig komisch hüüt.
Ick kam noch mol vun anner Siet,
wiel ick doch na Huus hin müch.
Ick to'n tweeten mol nu trüch.
Noch extra langsam ganz in Schritt —
denn kriggt de Kassen dat woll mit.
He markt woll, ick bin nich so schnell,
dat ich nich noch'n Bild bestell.

Aber dat hett uck nix nützt.
Dat hett to'n drütten Mal nu blitzt.
Kann dat angahn, dat so'n Ding
jümmerto egolweg blinkt?
Wat woll de Möglichkeit besteiht,
dat so'n Dings mol öberdreiht?

Föhrt man langsam ganz gemütlich,
ward de Biller extra düütlich.
Na de Schandarms heff ick se bröcht
un ick heff jem dat uck seggt:
"De Blitzer is nich mehr ganz echt."
Ick har keen Biller hebben wullt.
De meenen, ick har sülben Schuld.
Ick har mi doch bloß anschnalln müsst,
denn har de Apparat dat wüsst.

Een annern hett betahlen müsst,
wiel he dor to schnell föhrt is.
He hett betahlt ganz stolt sogor.
Dat wiest, dat sien ole Klapperkoor
wohrhaftig de Geschwinnigkeit
up fiefunföfftig kriegen deit!