Mi fehlt veel an manchen Dag,
ok veel Schlaap so inne Nacht,
wiel ick so in Sorgen bin:
Wie geiht de Dag woll morgen rüm?
Ick kann faken nich richtig schlapen,
heff noch in Halfschlaap een Oog apen.
Man öberschlöppt dat eene Nacht,
wiel dat annern Dag anners utsehn mag.
Doch annern Morgen meist
geiht mi de Wecker up'n Geist.
Bin jümmer froh, wenn ick dat schaff,
mit frohen Moot un frische Kraff,
de Arbeit ut'n Weg to gahn.
Dat is morgens glieks mien Plaan.

Wie hollt man sick ut Arbeit rut?
Man arbeit Arbeitsplanen ut,
dat makt keen Krach, dat is nich luut.
Ick sitt an mienen Arbeitsplan
ganz besunners arbeitsam.
Dor ward de Knaken nich so lahm,
kam aber faken doch in Schweet
un warr dorbi de Arbeit leed.
Kann uck faken richtig stöben.
Dat willt veele Lüer nich glöben.
Vun goode Arbeitsplanung
hebbt de keene Ahnung!

Arbeit? Nee, bloots nich!

Veele hebbt ut gooden Grunnen
gewiß de Arbeit nich erfunnen.
Wer hett se woll erfunnen?
De ward söcht, de is verschwunnen.

Man kann mit de dummsten Saken
sick jede Menge Arbeit maken.
Wat eenfach geiht,
dat ward verdreiht.

Wat schnell mal maakt is un bequem,
dat is den Minschen angenehm.
Veele Minschen, de man kennt,
hebbt to'n Schweeten keen Talent.
Ohne Schweet is veel bequemer
un dorüm uck angenehmer.
Makt doch Spaaß, sick uttorauhn,
dat hett mit Fuulheit nix to daun!

Fründ Hein hett jümmer Arbeit hatt.
Up'n Arbeitsamt gefull em dat.
Nu hebbt se em entlaten.
Dat kann he gor nich faten.
Na dat Arbeitsamt to gahn,
ohn Arbeit, dat wör nich sien Plan.
He mutt nu, verflixt verdammt,
ohn Arbeit doch na'n Arbeitsamt.

Uck ick heff gegen mienen Willn
veel Fragebögen uttofülln.
De müch ick mit Vergnögen
alle ünnerplögen.
Wer Arbeit söcht un keene kriggt,
den gefallt dat mehrstens nich.
Annerseen will dat nich glücken,
vör de Arbeit sick to drücken.
De gefallt dat rümtolungern,
man ward jo uck nich glieks verhungern...
Dat schall wohrhaftig Minschen geben,
de quält sick doot, üm goot to leben!

Arbeit allgemeen
is besunners schön,
wenn dat mit wenig Kraft
veel schafft.
Schüffel un Bessen heff ick nahmen,
up so'n Idee musst eerstmol kamen.
Weetst du, wat'n goodes Wark is?
Muttst mol een wiesen, wat'n Hark is,
wat ganz goot to maken geiht,
wenn de Stääl na baben steiht,
un wenn uck de Harkentinnen
na baben wiest un nich na ünnen.
Lat di dat mol dörch'n Kopp gahn,
dat kann di mol an Kopp schlaan.
Wenn een denn up de Hark pett,
geiht dat ganz schnell, bit he dat markt hett.

Dat Allerbeste is dorbi,
wenn annerseen dat maakt för mi.
Wenn jümmer bloß an Jachtern bist,
weetst nich, wo vörn un achtern is.
Man schall ole Lüer to Arbeit drieben,
denn künnt de jungen grade blieben.
De Dokter fraagt, wie dat so steiht
mit mien Leistungsfähigkeit.
Eerstmol heff ick an Arbeit dacht
aber naher öber lacht.
Jüst wat man nich so leisten kann,
dat strevt man doch an meisten an.
Woför man geern an meisten deit,
is Luxus un Komodigkeit.

So richtig schön gefallt dat nich,
wat man so goot nich ferdig kriggt.
Dat geiht los mit wenig Lust,
wenn du nich geern maakst, wat du musst.
Denn is dat meistens keen Genuss.
Ick maak üm Arbeit geern so'n Bogen,
wat logisch is för Psychlogen.
Besunners wat man nich goot kann,
strengt denn doch besunners an.

Geld to verdeenen ganz bequem,
dat is jümmer angenehm.
Manche brukt för Geld bloß schnacken,
dor brukst di nich so aftoracken.
Muskelkater kriggst denn nich.
Schnacken geiht nich so in Rüch.
Wat so normal mit Muul geiht,
mark ick bald gor keen Fuulheit.
Meistens ward ganz selten luert,
dat schwore Arbeit länger duert.

Man will doch nich sien Tiet veraasen
mit Arbeit oder Trübsal blasen.
Mit Arbeit mag ick mi nich quäln.
Ick mag leever Football speeln.
Dor ward man den Schweet
so schnell nich leed.
Mi liggt veel an't Footballspeel.

Ick heff jümmer richtig wüsst,
wie man Football spelen müss.
Man mutt goot zieln un richtig dräpen,
dat hebbt veele nich begräpen.
Ick har spelen künnt bi Werder Bremen,
de wulln mi fröher öbernehmen.
För 12 Millionen wör ick bestellt,
doch leider harr ick nich so veel Geld.
Ick dach, dor haal ick Gold weg —
dor wör ick up'n Holtweg.
De Football, dat heff ick nich ahnt,
löppt nich so ganz, wie man dat plant.

Man kann woll Arbeit fardig bringen
un dorbi fleiten oder singen.
Ick spuck mi faken inne Hand,
denn so ward dat intressant.
Blots dat een sien Arbeit deit,
dorbi up eene Stell denn steiht
un denn düchtig singt un fleit
mit beide Hannen inne Tasch,
denn is man doch woll öberrascht.
Dat is nich eenfach to begriepen.
Is dat woll Arbeit ? — Fleitschepiepen!

Een Mann fragt bi 'ne Firma an,
wat he dor Arbeit kriegen kann.
He harr nix lehrt, ut düssen Grunnen
har he noch keen Arbeit funnen.
"Wat", sä de Chef, "noch gor nix lehrt?
Ganz prima, dat is nich verkehrt.
So'n Minschen kriegt wi geern to faten,
den brukt wi nich ümschooln laten."

Bildung? Och nö...