Wat ik giern wull

vun Behrend Böckmann

Ach, wat giern wull ik promoten
Schwattsuer mit Wickelpoten,
un ok kotschen (coachen) wür ik giern
Fautballer ut Nåh un Fiern,
un för männig Trillerin
ok dei Männätscher (Manager) noch sien.

Is de Trillerin en Triller,
trillt de Triller jümmer willer!

Ik wull so giern ganz fien dinniern,
sotierte (sautiert) Happen mål probiern,
as Gurmäh (gourmet) Gröhnuje (grenouille-Frosch) äten,
üm't Mangkåktäten tau vergäten,
wull giern mål as Pariser kåken
un "pot au feu" mi sülben måken.

"Solang mien Been noch dran sünd, maak
ik fix de Fliege! Tschüß un Quak!"

Ik wull mal in 'n Fleiger rin
un as ik bi Check-In denn stünn,
wier't mit einen Mål denn wiss,
dat dei Flauch gekänzelt (canceln) is;
ut is dat mit den Tropen-Ritt,
ümsüss so männig Buuster-Sprütt.
(boostern = Impfung auffrischen, wiederholen)

As ik wull Schicken-Naggets (chicken nuggets) bråden,
däd 'n gauder Fründ mi råden,
ik süll mit dei Mus man klicken
nå 'n Rezept von Hähnchensticken,
dat Rezept denn fien daunlåden (downloaden)
un dornå dei Sticken bråden.

Staats in Stücken Stick för Stick
bråd ik dat ganze Chick an't Stück!

Üm as Sänger Faut tau fåten,
wull ik mi mål kaasten (casten) låten,
un Frünn', dei ik von't "Facebook" kenn,
dei poust (post) ik bet an't Weltenenn':
Ik heff performt un allens gäben,
ward von'n Gesang bald ganz gaut läben.

Dat deit sihr gelihrig klingen,
wenn man kann up Dinglisch singen,
doch mi deit dat mächtig stürn,
ik wull väl leiwer Plattdüütsch hürn,
so as vör Johren unse Ollen
sik up Platt hemm' ünnerhollen!

Güll nich bloots in de ole Tied:
Platt is uns Spraak un platt uns Lied!