Blots för de annern

vun Heinz Tiekötter


De Verband vun de Köken-Fabrikanten hett dat rutfunnen: In'n Dörchschnitt gifft de Keuper vun een nee Köök 6.700 € ut. Dat gifft ober ok Lüüd, de betohlt för ehre Köök an de 70.000 €. Een, twee Mol in Moond veranstalt se denn dorin Koken as Event. Denn geevt se düchtig an un mookt jemmer Gäst needsch.

Dorto mutt een weten, dat de mehrsten Lüüd vundag veel to oftens Fardig-Eten un Pizzas in jemmer Mikrowellen un Backobens warm mookt, as dat se süllmst frisch wat kookt. Dat kann een ok an de gelen Sacken sehn. Un de Tiet vun de Krüdergorrns is sowieso all lang vörbi.

Wenn du dat eerste Mol bi Hein Meier in sien neen Wogen sittst, duert dat tein Minuten, bevör he affohrt. He ward di eerstmol wiesen, wat dor för Technik in sien Auto insteekt. Dat Ding fohrt alleen un klappt no dat Inparken de Spegel an. Will Hein trüchmors fohrn, kümmt ut dat Armaturenbrett en Telewischen un wiest em den Afstand. Op jeden Sitz kannst du dien egen Klima moken un mit en Jeustick stellt Hein allens in.

Huusmokler Herbert Brumm hett sik 'ne Segelyacht köfft. He vertellt geern öber de Seedüchtigkeit vun sien Schipp un wat he all för Storms dormit afreten hett. Annerlest harr Brumm Gäst an Boord un kreeg dat Grootseil nich hooch. He wüss nich, op welk Oort dat funkschoniert. So sünd se 'n beten ünner Maschien vör de Huusdöör hen un heer fohrt. Dorbi harrn se an düssen Dag so 'ne scheune Bries.

Bist du bi Korl Drews op Beseuk, denn hest' dien eerst Glas Beer noch nich utdrunken, denn steiht all de Beamer op'n Disch. Freuher wiesen se di mit jemmer Dias, wo se allerwegens weern. Hüüt sünd se elektronisch. Neegst Johr wüllt se mit ehr Knipsmaschien no'n Südpool.

De Lippen vun Krischan Müller siene Fro seht ut as'n Schlauchboot. Se geiht alle veer Weken to ehr'n Visagisten un lett sik de Folden mit Botox wegsprütten. Gode dree Weken lang hett se en Huut as'n Appel, denn mutt se wedder hen. Lachen sall se beter nich mehr; an'n Enn ritt dor noch de Pelle in.

Ik meen, wenn uns Gesellschop sik de Lachfolden mit Nervengift wegsprütten lett, mööt wi dor nich mol öber uns Werte nodinken?


10.9.2017


na baven