Christopher-Street-Day

vun Heinz Tiekötter


Froensminschen hollt beter tosomen as wi Mannslüüd. Du müsst di dat mol vörstellen: To mienen Boortsdag ward mi elkeen Johr "Creme de Loire"; dat is so'n edles Suuswoter, Schampus orrer Prosecco schenkt. De Froens vun mien Frünnen weet, dat miene Fro dat so geern drinkt. Dat ik Boortsdag heff un mi öber en Buddel Kümmel freien wurr, interessiert keen Oos. Ik drink neemlich lebber Kööm un Beer un nich so'n weken Kroom.

Dat ik mi mit miene Intressen so trüch sett feul, liggt blots doran, dat mien Frünn to fuul sünd. Wenn ik to miene Boortsdagspartie inlood, öberloten se dat ehre Froens, för mi en lütt Geschenk to besorgen. Un dat ward jümmers en groten Blomenstruß or en Gewächs för uns Balkon. Wieso sall ik mi jeedetmol öber veer, fief Strußen vun mien Fro ehr Lieblingsblomen freien? För so en Struss kriggst ok all en goden Buddel Whisky.


Denn aver ok fein in'n Bikini kamen, Heinz!

Un Tante Hermine backt elkeenmol den Mohnkoken, den miene Fro so geern itt un den ik öberhaupt nich mag. De liggt mi op'n Mogen. Un ik sall mi noch dorför bedanken.

Ik segg di, dor steekt en System achter. Dat is doch geballte Froenspower un en bannige Ungerechtigkeit gegen uns Mannslüüd. Kannst du di vörstellen, dat jichtenseen miene Fro to ehr'n Boortsdag en Buddel Jonny Walker schenkt?

Anduernd snackt se öber Gliekdoon un Quotenregelung. Dor ward dat doch Tiet, dat ik mol wat Perseunlichet schenk krieg, wat för mi alleen bestimmt is. Anduuernd mutt ik "Scheun Dank" seggen, för Soken, öber de miene Fro sik jümmers freit. Sowat geiht mi gewaltig op'n Senkel.

Neegstet Johr kannst du mi op den "Christopher-Street-Day" drepen. Denn will ik mi för dat Gliekdoon vun de Geschlechter insetten. Ik warr dorför demonstrieren, dat wi Mannslüüd bi de Geschenke jüst so gerecht behannelt ward, as de Langhoorigen.


13.8.2017


na baven