Dei Indoor-"Gassi"-Palast tau Cardiff

vun Behrend Böckmann

"In Cardiff is al wedder Schietweder!
Woans schallt wi dorbi stubenrein warrn?"

Von Cardiff wull ein jeder weit,
Dat so von Wales dei gröttst Stadt heit.
Von Cardiff is ok weltbekannt,
Dat gauder Whisky ward dor brannt,
Dat dor dat Bara Brith* ward backt
Un dat 'n dor walisisch schnackt.
Dei Hoge See, den groten Håben,
Ok olle Schlötter deit 'n låben.
Cardiff gifft dormit dull an,
Dat man dor wat beläben kann.
Sülfst dei Dåk an väle Dåch
Is in Cardiff nich dei Plåch,
Blot dei väle, väle Rägen
Kümmt dei Hunn' nich sihr gelägen.
Un möten's mål nå buten rut,
Hollen's lang dat dor nich ut.
Fixing is man wedder binnen
Un mücht wull einen Utwech finnen,
Dormit man denn bi't "Gassi-Gåhn"
Nich mihr mœt in'n Rägen ståhn.

*Bara Brith: ein Früchtebrot

"Oooch nöööö, nich bi'n Rägen rut!"

Un schon keem't einen in den Sinn:
Wi trecken in ein Kophus in,
Wo kein Kunnen mihr in wanneln,
keonein deit mihr mit Woren hanneln,
Un buugen in't oll Muerwark
Einen "Indoor-Gassi-Park"!

"Nanu? Wat schall dat denn ween?"

So wür ein Kophus renoviert
Un as Hunn'park utstaffiert.
Wischen, Böm un Pœhl von Lüchten,
Allens deit nå buten düchten,
Gråd so as inne frie Natur,
Wo Hunn' denn hemm' ehr Schnüffelspur.
As'n Lopfüer måkt dat dei Runn',
dat "Gassi"-Hus för Cardiffs Hunn'.

"Is echt vull realistisch hier!"

Up den Infall kümmt dat an,
Woans man Geld verdeinen kann!
Dit Hus hett groten Anklang funnen,
In'n Drögen dreiht 'n nu sien Runnen.
Köfft sik 'n Kort för 'n ganzen Dach,
Wenn man nich nå buten mach.
Söss Euros gifft man dorför ut
Un möt würklich nich mihr rut.

"Also sowat von realistisch! Sogor mit Blaumen tau jede Johrstied!"

Is in'n Harst dat Wäder mies,
Köfft man 'n Monatskort tau'n Pries
För gaut 'nen Euro œwer'n Dach
Un hett dormit sien dröget Flach.
Vörbi is all dei Gassi-Last
In den Indoor-Hunn'-Palast,
Un man ward weltwiet em låben
As dei Mäten in den Håben.

"Dat mutt dat Holodeck vun't Ruumschipp Enterprise ween!"