Noahs Blog


Vunwegen sien Rechtschapenheit hett Gott Noah utwählt för en eenzigaartig Aventüür. Lesen kannst dat in't 1. Book Mose (Genesis) Kapitel 5-9. Man wat dor nich steiht: Noah hett natüürlich en Internet-Blog föhrt! Dat kannst hier lesen.

Dag 1: Regen.

Dag 2: Regen.

Dag 3: Regen.

Dag 4: Regen.

Dag 5: Regen.

Dag 6: As ik jüst bi't Verladen vun de letzten Deerten bün, kümmt mien Naver Lüders, de den Moloch anbeden deit. He grööt mi un seggt: "Süht na Regen ut, wat?" — Is echt wohr.

Dag 7: Ik maak mi nu en Geweten, wat dat recht weer, mi Lüders sien Heckenscheer to borgen. Kann se em ja sachs nich trüchgeven. Wi swemmt!

Dag 15: De verleden twee Weken weer't allns een doon, man düsse Nacht hett uns Elefantenmama ehr Baby kregen. Ik warr glieks en poor Fotos hoochladen!

Dag 16: Dat Elefantenbaby! Nu kiek di doch düssen lütten Buttscher an! Wi mööt em en Naam geven. Hett een vun ju en Idee? Un kaamt mi nich mit "Bimbo"!

Dag 18:
Neegst Maal, wenn ik op'n langen Törn bün un partu Federball spelen will, maak ik dat ünner Deck, ik Dööskopp. Dröff dat nich vergeten.

Dag 20:
Ik mag dat kuum dalschrieven, man beter segg ik de Wohrheit. Gistern Avend weer ik noch en Stalldöör bi to repareern (ik heff doch sachs mehr as twee Holtwörms an Bord), do föhl ik, dat mi wat in den Nack steken deit. Ahn natodenken heff ik toslaan. — De niege Welt na de Floot warrt ahn de Zingizingi-Mück utkamen möten...

Dag 23:
O nee! Noch een Deertenaart is utstorven! De lütte Elefant hett an Deck mit de Eenhörners speelt un ehr doch glatt över Bord schubst! Ik do so, as harr ik dat nich mitkregen. Mien lütte Söhn Japhet huult sik de Ogen ut na de Eenhörner.

Dag 25:
Niejohrsdag. En poor gode Vörsätt:

  • poor Kilo afnehmen (mal ehrlich, ik bün ja nich mehr 300 Johr jung)
  • mehr Sport
  • de ganze Bibel lesen (dat Ding hett ja bloots 4 Kapitel, dat schull ik woll henkriegen)
  • wenn wi wedder an Land sünd: eenmaal per Week en romantische Avend mit mien Madam.

Dag 27:
Ik will ja nich an mien Ur-Ur-Ur-Ur-Ur-Ur-Ur-Urgrootvadder rümkritteln, avers ik hang nu ok al en ganze Tied mang Deerten rüm, un en poor vun de Naams, de he ehr geven hett, sünd wirklich dösig.

Adams Naam Mien Vörslag
Kaninken Hoppeldihopp
Hund Wuff
Aant Wackwack
Fladdermuus Iiiiiiiiie!

Dag 31:
Ji all leest mien Blog. Ji weet, ik bün mien Madam hartens good, ja? Aver würklich, af un to kann se so'n rechte Nervensaag ween! "Dat Dack leckt, Noah!" "Noah, de Schaap sünd klatschnatt vunwegen dat dat Dack leckt!" — Weet ji wat? Af un to bruukt Papa ok en beten Tied för sik!

Dag 33:
De Vagels kost mi den letzten Nerv. Fladdert un hibbelt in ganze Swarms rüm, as harrn se den Düvel in'n Moors, schietert överall hin un maakt mi Tinnitus mit ehr Getriller. Een Glück mutt ik mi nich ok noch üm de Fisch un dat Water-Veehtüüch kümmern!

Dag 38:
Jeden Dag lehrst wat dorto! De Floot is eendüdig in de verkehrte Johrstied kamen — Brunft bi mennig Spezies! Wenn de Flusspeer Leevde maakt, schuckelt de ganze Kassen. Un en Radau maakt se! Fief Nächte heff ik keen Oog todaan! Jedeen Astlock in dat Zypressenholt vun't hele Schipp heff ik tellt. Dat sünd 13955.

Dag 41:
Jichenswie winnt Ham jümmers bi'n Skat. Wo maakt de Jung dat?

Korrektuur: Tovöör schreev ik, uns Schipp harr 13955 Astlöcker. Ik harr avers dat Dack vun't Böverdeck vergeten. Nu heff ik dat mittellt un to Sekerheit allens noch tweemaal dörtellt. Wi hebbt 16201 Astlöcker.

Dag 45:
Okay, also as Gott sä, he wöör dat 40 Daag un Nächte regen laten, dor dach ik, denn wöör dat vörbi ween. Apensichtlich leeg ik verkehrt.

Dag 87:
Heel un deel verkehrt...

Dag 110:
Mien Madam meent, ik harr den Koller kregen un weer dörchdreiht, avers ik bün seker, de Minschenapen hebbt sik to Meuterei versworen. Ik seh dat nau, woans se mi ankiekt. Kann nu nix mehr seggen, later mehr.

Dag 150:
Wi sünd op so'n Aart Barg op Grund lopen. Later mehr.

Dag 190:
Heff en Duuv rutschickt, man se keem trüch.

Dag 197:
Dütmaal keem de Duuv trüch mit en Öölboomtelg. Dor weern noch Oliven an. Ik warr Madam na Rezepte för Duuv in Oliven fragen.

Dag 204:
Heff de Duuv utschickt, noch mehr Oliven för't Avendeten to bringen, man se keem nich trüch. Dat kann heten, a) dat een na de Floot mit de Breefduventucht ganz nieg anfangen mutt, b) dat se dröög Land funnen hett. Gode Utsichten! Denn sünd wi ja villicht ok bald rünner vun dat Boot!
Slechte Naricht: Madam Noahs "greeksches Duven-Soufflé" is en Rinfall.

Dag 231:
Nu sünd wi also op Land. Na denn! En dicken Dank an ju all, de ji mien Blog leest un uns Posts un Mails schreven hebbt. Blangenbi, mien niege Emailadress is noah@barg-ararat.com. Ik warr noch af un to wedder wat posten, dat ji jümmers op Draht sünd. Wat mennig vun ju weten wulln: Nee, ik heff keen YouTube-Channel!

So, un nu bruk ik en Beer.

Hallo Lüüd,
mal wedder en Indrag! Mien Enkelsöhn Kush hett en feinen Schoolopsatz schreven, den ik ju doch wiesen mutt.

Mien Papa
vun Kush, 7 Johr oolt

Mien Papa, de heet Ham, un he weer maleins op en heel groot Boot. Dor is he mit rümmerfohrt, länger as en Johr. Dat is ganz schön lang! He seggt, as se vun dat Boot rünnerkemen, weer de Bodden wirklich Matsch. Schiet, wat?
Dat Boot hebbt wi noch un ik speel dor un heff masse Spaaß.

Hallo Lüüd,
hier noch en poor Rezepte för mien leevste Cocktails!

Verdrunken Eenhoorn

1 Schuss Kroonsbeern-Saft
1 Schuss Orangensaft
1 Schuss Eerdbeersnaps
1 Schuss Wodka

Kippt den Wodka un den Eerdbeersnaps in en Glas vull Ieswörpel. Mit den Kroonsbeern- un Orangensaft opfülln. Mit'n Strohhalm serveern.

Barg Ararat Iestee

Tequila 1 shekel
Wodka 1 shekel
Gin 1 shekel
Curaçao 1 shekel
Cola 1 shekel
Rum 1 shekel

Allens vermengeln un mit Ies in't Glas.

Regenbagen

1 Schuss Creme De Noya
1 Schuss Midori
1 Schuss White Creme De Cacao

In düsse Reegnfolg in't Glas geten!

Prost!

9.2.2020


na baven