Dat kannst mi glööven!
För weckern geihs du?

vun Diakon Hubert Looschen, Garrel


To'n Anhören hier klicken:


Lesen deit Hubert Looschen in Südollenborger Platt.


At dei ABC-Schützen vör einige Daoge dat eierste Maol inne Schaule mössden, drögen sei aale up'n Rüggen den Schaultörnöster. Vörne harn se inne Hand dei Schaultuten. För dei eiersten Daoge is dei Schaultuten wichtiger at dei Törnöster. Van buten is sei bekläwet. Wenn du genau henkicks, weiß du all 'ne ganze Masse äöwer dat Kind. Man kann dat anne Upkläwer seihn. Dei eine mag gerne Fautball un ein'n ganz bestimmten Verein, dei annere schwarmet för 'ne Fernsehserie, dei drüdde mag gerne Peerde, un Bilder van Puppen kanns uck seihn. Dei Öllern un Paten wätet, wat dei Kinner mäöget, wat se gerne daut un kieket. Un dei Kinner frait sick un sünd stolt. Sei staoht dor tau, wat du up dei Schaultuten seihn kanns.

Wenn ji, leiwe Tauhörerinnen und Tauhörer, fraoget wüdden, woför staihs du, harn ji dann 'ne Antwort praot?

Ein Rabbi wüdd maol fraoget: Woför gaihs du? Rabbi Naftali dröp bi einen Spaziergang einen Wächter. In dei Stadt harn aale rieken Lüe ein'n. Dei passden up, dat nachts kiener inbräken kunn. Einer van dei Wächter frög den Rabbi: "För weckern gaihs du?" Dei Rabbi wör ja kien Wächter, dei Fraoge dröp üm midden in't Haarte. Hei mössde öwerleggen un dann taugäwen: "Noch gaoh ick för kienen." Un hei frög den Wächter, off hei nich sien Diener wern wull. Dat wull dei Wächter woll. Aower ers mössde hei wäten, wat hei daun schull. "Du moss mi immer wedder säggen, dat ick mi fraoge, för weckern ick gaoh."

Enlick schull dei Rabbi doch wäten, för weckern hei gaiht, is hei doch ein Mann, dei wat van Gott un 'n Gloven versteiht. Mi heff dei Geschichte tau denken gäwen. Staoh ick dor immer achter, wat ick vertell, prädige? Kann man an mien Läwen seihn, för weckern ick gaoh? Ick will nu nich einen Mann off eine Frau instellen, wecker mi dor an denken helpet. Dei Fraoge gaiht mi aower nao. Ick will verseuken, dor mangers eine Antwort up tau finnen.

Wör dat uck wat för jau? För weckern gaihs du? Wecker sick so frögg, find 'ne Antwort.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


30.9.2016


na baven