Dei Krüüzverleihner

vun Behrend Böckmann

Ein Fomilie, dei mihr von Mohamed as von Jesus höllt, läwt siet Tieden dor in Jerusalem, wo dei „via dolorosa“ anfangt, up wecker nå’t Vertellen einst Sünner nå Golgatha — den Knåkenbarch — gåhn mössten, üm dor den Krüzdod tau starben. Un as dat Mod’ wür, dat Christen as Pilger mit ’n Durnenkron up’n Kopp un ’n Holtkrüz up’n Rügg dissen Leidenswech von Jesus güngen, üm up disse Oort in sik tau gåhn un sik dei Sünnen vergäben tau låten, keemen dei Vöröllern von den Muslim up ’n Geschäftsinfall: Sei buuchten Krüzen ut Holt, hemm’ dei denn gägen ein Spenn’ an Pilger verleihnt un sünd so tau gaude Innåhmen kåmen. Dei Krüzdräger kann sik œwer ok gägen ’n Festpries von den Verleihner aflichten låten — un dat bringt noch eins bäten Geld inne Kass’.

Inne Karwäk löppt dat Geschäft besonners gaut, denn üm disse Tiet sünd so väl Minschen mit Durnenkronen un Krüzen up’e „via dolorosa“ nå Golgatha ünnerwägens, dat männigein gor nich weit, wohen hei pedden sall. Un dei Pilgers hemm’ von den Krüzverleihner hürt un sei kihren bi em an. Up den Wech dorhen tellen’s all ehr Sünnen tausåmen un beschluten denn för sik, wecker Grött dat Krüz för dei Sünnenvergäbung  hemm’ sall. Utleihnen kann man „S“, „M“ un „L“-Krüzen tau 15, 30 un 45 kg. Hett ’n Pilger sien Krüz utsöcht, denn puckelt hei dat œwer alle 14 Krüzwechstatschonen henwech un stellt dat denn driewendnatt vör dei Graffkark af. Mit rinnernähmen dörv man dat Krüz nich, un man möt sik ok nich wieder üm sien Krüz kümmern, denn dei Verleihner mit Brauder un Veddern is all dor, dei Krüzen wedder aftauhålen üm sei von niegen an niege Pilger tau verleihnen. So anne 50 Krüzen sall dei Krüzverleihner besidden, dorünner ok wecker, dei sien Grotvadder al timmert hett. Un dat gifft ganz schlichte Krüzen un dat gifft weck mit Bronze-Ikonen in'e Midd’.

Plietsche Pilger willen giern weiten, woans dat angåhn kann, dat ’n Muslim dissen Deinst för Christen œwernåhmen kann, wenn hei Jesus nich för Gott sienen Sœhn höllt. Œwer dei Antwurt is einfach: Ok för den Muslim gifft dat Jesus as ’n wichtigen Propheten, as einen näben sienen gröttsten Propheten Mohamed. Un disse lütte Ünnerschied höllt ’n Muselmanen nich dorvon af, an Minschen Holzkrüze tau verleihnen, dei sik as Christen tau den Juden Jesus bekennen.

Respekt vör dat tau hemm, wat ein' annern hillig is, is dat nich ein gaude Anfang? Dat ein giern ok 'n bäten Geld dorbi verdeint, schaadt nix, wi sünd all Minschen. Un villicht sünd ja wi all, dei wohraftig Gott säuken daun, Geswister.