Dat kannst mi glööven!
Fassen — wat hebb ick dorvan?

vun Peter Kossen


To'n Anhören hier klicken:
Lesen deit Peter Kossen.


För 't Fassen giff dat allerhand Grünne: et is gesund, maokt frei, et schenkt Tied, spaort Geld. Bewiesen will ick mi un ännere: Ick kann uk oahne — Alkohol, Roken, Fensehen, Smartphone. Fassen is Winnen aower sick sülwes; je schwäörer de Vezicht is, üm so mehr. Dat Minnere torügg laoten, üm dat Gröttere tau winnen: dorför daut Mensken sick Fassen an.

Gesundheit un Freiheit sünd dei Maihde wisse wert. Man Fassen, so at Jesus Christus 40 Daoge fasst hett, dat gaiht noch deiper. Fassen mit Jesus is Frei-Wern van un Frei-Wern för. Mit Jesus gaohn, dat heit "Läben för…": för Gott, för Gotts Riek, för dei Mensken. "Gotts Riek" — dat bedüet: Dei Himmel kump up d' Eern un nicks mott so blieben, at et is. Dei Armen möät nicht hungern un dei Sklaoven köänt sik befreien.

Fassen is Taulustern un Utkieken: Wor is d' all wat van tau seihn? Woneier is 't sowiet? Dei bätere Welt inne Künne kriegen, Läben för Gerechtigkeit, Brot deilen un Sklaoven freilaoten — dat is "Fassen". Dei bätere Welt is dor, wor Mensken Süsters un Bräuers sünd mit alle Mensken un wor sei wät: Wi hebbt us disse Welt man bloß utlehnt van use Kinner un Kinneskinner. Dat alle nauch taun Läben hebbt, dat is Gesetz in disse neie Welt. Dei Mensken mit ehre Not un ehre Fraide inne Künne holen un dei Natur nich veschlieten: dat meent "Fassen".

Vellicht mott ick nödig wat ännern in miene Wiese, tau aosen mit Gesundheit, Geld, Äten un Drinken. "Kien Billigfleisch inne Fassentied!" Wat Mensken, Deierts un Natur andaohn wet för dei billige Wuss un dat billige Putenfleisch, dat kann man nich gaut maoken. Mien Brauer Florian sütt at Doktor jeden Dag, wie Mensken lied an Säle un Lief, wenn sei at Lohnsklaoven in groote Schlächtereien in Lohne, Wildshusen, Aohlhorn un ännerswo vebrukt un veschläten wert. För 'n Schlaopplatz in 'n Rottenlock wert d' 300 € off mehr van 'n Hungerlohn afftrucken. Un wecke dat nich mehr utholen kann of krank wet, dei wet utwesselt, wegschmäten at 'ne olle, keputte Meschinen. In dei Rottenlöcker woahnt uk Familien, wert Kinner groot. Un wi wät d'van un laot dat passeiern!?

Fassen bedüet waok wern, upstaohn, ingriepen! Leiwe Tauhörers, laot us wat bäter maoken: "Kien Billigfleisch inne Fassentied!"


Ok de Deerten wüllt frie ween un den Himmel sehn!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


23.6.2019


na baven