Dat kannst mi glööven!
Nu koamt man, et staiht aal paraot!

vun Peter Kossen


To'n Anhören hier klicken:


Lesen deit Peter Kossen.


Sr. Eveline hett 1978 in Mönster den "Treffpunkt" anne Clemens-Karken gründt. Dat was dei "Treffpunkt" för ehre Frönde van d' Straoten. Sr. Eveline gew ehr tau äten un tau drinken, 'n Stäe taun Duschen un 'n Ohr för aals, wat dei Obdachlosen ehr vetellen wullen. In Rechterfeld is Sr. Eveline at Meyers Mia born un upwussen. "Wi haarn kien Geld, aower aals taun Läben: dei Leiwde van uuse Öllern un ein Tauhuus", so hett Sr. Eveline faoken vetellt. Un beides hett sei jeden Dag mit Fraide an ehre Frönde van d' Straoten veschunken: Leiwde un ein Tauhuus. Wektien, so vetellde Sr. Eveline, köäm dat Gespräk in 'n "Treffpunkt" sogaor up 'n Herrgott off 'n Häven. "Ji weert tau eierste bedeint", dat hett Eveline ehre Lüe vespraoken. "Wenn dei Herrgott inlaodt tau dat groote Maohl, dann sünd ji ganz vörn. Ick hebbe hier up d' Ehrn all vääl Gaues, un ick frai mi, wenn ick dann an 't Fenster van 'n Häven staoh un taukieken draw…"

Sr. Eveline kunn uck resolut wään un dörgriepen. Alkohol gew dat in ehrn "Treffpunkt" nich, un Spektaokel wütt d' nich maokt. Man sei kunn in disse kaputten Mensken Gotts Döchters un Söähnen seihn un so wull sei d' uck mit schnacken: at mit Gotts Döchters un Söähnen! "Eines Daoges", so hett sei ehr tauseggt, "eines Daoges köänt dat alle wäten, dat ji d'bihört. Gott segg dann: Nu kaomt man, et staiht aal paraot!" —

Jesus vetellt van einen, dei hett siene Frönden inlaoden tau 'n grotet Festmaohl. Man einen naoh 'n ännern segg aff. Aal hebbt se wat bäters vör. Dei Gastgäber is d' dull van un hei stüürt siene Deiners uppe Straoten un dann uck vör d' Stadt: Alle, wecke sei find't, köänt kaomen: Kröpels un Bädellüe, Uutlänners un tautrucken Volk. Un süh: Dei Lüe laodt sick nich lang nödigen, dei Saol wett vull. Sei hebbt begräpen, worüm et gaiht.

Sr. Eveline har gaue Oogen. Wat änner Lüe affstött, dat mök ehr nich bange. Ehre Frönden vanne Straoten wassen meist nich schön antaukieken: vekaomen, vegammelt. Eveline seehg deiper, seehg in ehr dat Kind, dat schraide vör Angst — Gotts Kind! Ganz behött leet sei dat Kind groot weern. So hett sei manche Lüe van d' Straoten haolt, trügge in 't freie Läben.

An 'n 2. April 2013 is Sr. Eveline Meyer storben. Ich glööve, sei staiht in 'n Häven nich bloß an 't Fenster. Sei frait sick: Ehre Frönden sitt an Gotts Disch, weert at eierste bedeint un hört: "Nu kaomt man, et staiht aal paraot!"



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


17.9.2017


na baven