Dat kannst mi glööven!
Jesus läwt! Sien Geist driff us an!

vun Peter Kossen


To'n Anhören hier klicken:


Lesen deit Peter Kossen.


Klock twölwe jeden Middag gaiht 'n öllern, einfachen Mann inne Karken un kump d' bold weer herut. Dei Pastor krich dat inne Künne, un hei fraogt üm: "Wat daut Sei jümmers inne Karken?" "Bäen", säg dei Mann. "In den kotten Moment?", dei Pastor weit nich recht. "Ick kann kien lang Gebett", dei Beseuker is ehrlich. "Ick gaoh alle Daoge üm twölwe d' herin un sägg: Jesus, hier is Johannes."

Eines Daoges mott Johannes in 't Krankenhus. Bold seiht dei Schwestern un Doktors: Dei olle Mann dait dei ännern Patienten gaut: Dei Luunschen sünd nich mehr so gräsig un dei Trurigen köänt uck maol lachen. "Johannes, Sei sünd jümmers so sinnig un froh…", säg dei Doktor. "Och, Herr Doktor, dat kump van mien Beseuk." Nüms hett bi Johannes Beseuk seihn. Verwandte giff dat nich, un uck anner kump d' kienein. "Ehr Beseuk", fraogt dei Doktor, "Wat för ein Beseuk?" "Jeden Middag Klock twölwe. Hei kump d' herin, trett an 't Fautenne van 't Bedde un segg: Johannes, hier is Jesus."

Jesus seihn, beläwen, dat Jesus läwt: Mensken sähnt sick woll dornaoh. Jesus taulustern, siene Leiwde un Fröndschup fäuhlen! Studeiert hebben of änners prepareiert wän mott m' nich, man arm genaug…

Leiwe Tauhörers, Jesus läwt, sien Geist driff us an — dorvan will ick in disse Daoge schnacken. Jesus lett sick uck vandaoge seuken un beseuken, trett in 't Läben van Mensken. Einmaol van Jesus anstött un anspraoken, willt un köänt Mensken nich mehr oahne, willt mit Jesus läben. Man — maoken kann man dat nich! Johannes, dei einfache olle Mann, hett 'n faste Tied dorför: "Jesus, hier is Johannes." Un Gott is nich taugaohnsk. "Ick staoh an d' Porten un klopp an", segg Jesus. "Wenn einen miene Stimme hört un mi aopen maokt, kaom ick herin un wi hebbt Maohltied: Ick mit üm un hei mit mi."

Ein groot menschlik Hart, dat liedt un mitliedt, dat lurt un lustert un utkick, so ein Hart is dei Porten, an dei Gott ankloppt. Un jümmers is dat dei Mensk näben mi mit siene Fraide un siene Not, wecke mi Jesus in 't Huus stüürt.

Watt mott ick daun, dat Gott in miene Welt, in mien Läben trett? — Bäter is 't woll tau fraogen: Wat mott ick laoten? Denn Gott is all lange daor! Mit Jesus läben un mit Jesus schnacken, at was et dat Gemeinste vanne Welt: Dei ole Mann dait dat einfach so. "Jesus, hier is Johannes" — "Johannes, hier is Jesus."



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


21.8.2017


na baven