Kinner un Kiekschapp. Teknen vun Rudi Witzke
Teknen: Rudi Witzke

Kiekschapp — afschalten!
Woso nich?

vun Rudi Witzke


De Schrievers un Snackers, "Jornalisten" nöömt, nehmt mi dat af, wat ik to weiten krieg un wat nich. Dat, wat wohrhaftig in de Welt passeert, ward trechtschneden up dat rechte Maat. Wenn Demonstranten den Schienenweg spaart vunwegen Atom-Müll, denn seiht wi de vun Putze wegdragen Lüüd, de vun de Demonstranten tosamenslaan Putze seiht wi nich.
Wi seiht Demonstranten, de ehr Fahnen wiest, doch dat achter de kuum noch welk kaamt, dat seiht wi nich. Biller lögen nich, orrer?

Wat tosamenhangt, ward ahn Gnaad köört. Dat, wat se uns wiest, hett faken nix mehr mit uns levig Leven to doon. Wenn se uns drei Minuten wat wiest, denn is dat veel. Meist sünd dat blots föftig Sekunnen. Un Slag up Slag geiht dat dörch de Welt! Vun Bagdad na Gaza, vun dor na Kabul, wieder na Oostasien un na Mood un Dieter Bohlen. Allens in 30-Sekunnen-Afsnitte.

Schiet is dat, dat jümmer mehr vun uns Landslüüd sik 21 Stunnen in de Week so en Bild vun de Welt maken un dat denn ok noch glöven.

Ümgang prenkelt. Je mehr Tiet ik mit een tobring, je mehr schünnt he mi sien Meinen in. Dat warr ik nich glieks wies, aver de Johren funktioneer ik, so as dat de Snackers willt. Ik övernehm ehr Reedwies, ehr Verhollen, ehr Denken un Doon. Dat Book "1984" lött gröten.

In en Unnersöken schulln Schöler in fööfteihn Minuten so veel Spröök vun Warven ut Kiekschapp nömen, as se in'n Kopp harrn. Welk kunnen föfftig herseggen, inslaten 15 Beersorten.

Gegenproov: Woveel Bibelspröök köönt Se herseggen? Villicht vergeten, aver Vadder Gott hett uns in de Bibel bannig veel to seggen.

Wenn ik 20 Stunnen in de Week för't Kiekschapp sitt, aver villicht, blots villicht een Stunn an'n Sünndagmorgen in'n Gottesdeinst, is dat dor een Wunner, dat wi nix mit Gott belevt? Ach ja, dor finnst blots de Olen un Verkröppten!

De Utwahl mit en Krimi is womööglich en Utwahl gegen twei Stunnen Gemeinschop mit Gott.

De aktuellen Narichten an'n Dag seggt nix över uns Welt ut. Vadder Gott will uns helpen, mit Öllern, Frünnen, up de Arbeit, in de School un nahsten ok noch mit uns in disse Welt trechttokamen. De Narichten laten uns mehrstendeils mit den Barg vun Narichten alleen. Un veel Wichtiges warrn wi gor nich wies.

Wokeen sik sülvst un de "Fernbedienung" in'n Griff hett, för den is güllig, wat Paulus seggt hett: "Ik heff Verlööf för allens, aver dat schall mi nich fangen nehmen."

Un dat is wunnsersaam, woveel Tiet een denn blifft, mit Minschen in Noot to snacken, Breef to schrieven un in de Bibel tolesen —— un beden to können, wenn Di dat dat Kiekschapp nich all utdreven hett.


Rudi Witzke

20.11.2003


na baven