Kien Tied

Vertelln ut de Coronatied vun Jutta Engbers


,,Wiehnachten fallt ut." —
,,Nich all weer."

An Anfang steiht dat Word. Schwatte Teken up witt Papeer, man wenn een drub
schreben is, bünt al annern utschloten. —

,,Wiehnachten kann nich utfallen."
Dat Word was bi Gott.
,,Wenn wi nich in Karke dröffd so as verleden Jaohr."
,,Hebbt wi us eegen Gottesdenst maokt — wi bünt mit Rad in Düstern in't Moor föhrt."
Brukt Gott Wööre, praot he mit sik süms?
,,Wi schöllt anner Lüe nich dräipen."
,,Alleen is kien Wiehnachten."

Praoten deit een, wenn een een anner Minsch dräiped. Wöör bünt nödig, wenn wi
us uttuschken, anrögen, binanner of övereen kaomen willt.

,,De Fiern weert affseggt. "
,,De bünt al affseggt."
,,Dröffd se dat?"
,,Nao wat van Regelwark? Ick hebb dat nich seihn."
,,Se hebbt in de Naorichten anseggt."
,,Praotereie."
Wecke Spraoke brukt Gott?

,,So hebbt ih dat nich so drock."
,,Meenst?"
,,Ick hebb den schwatten Freidag nützed un tauken Weeke bünt wi twei Daoge in
Ollenborg."
,,Daor hebbt se Wiehnachtsmarkt."
,,Solang schöllt woll noch gaud gaohn."
,,Wo veel Tied hebb wi noch?"
,,Bit 24. Dezember."
,,12 Daoge."
,,Is Wiehnachten lang."
,,Dat stimmt nich."
,,Hest maol naoreket, 24. 12. bit 6. 1. is twei Weeken — wat nao Adam Riese 14
Daoge utmaokt."
Wo twei of drei binanner kaomt.
,,Wiehnachten is an 25.12. un hillige Könige is, wenn Wiehnachtenween was."
,,Also is Wiehnachten uk dit Jaohr."
,,Wi dröffd nich fiern, daor kannst drub an."
,,Daor is nix tau fiern."
Tau de halve Nacht kumpt ...

,,Wat maok wi nu?"
,,Daor kann ick nich dröver naodenken, so veel Tied hebb ick nich."
,,lck kann't nich mehr hörrn."
Dat Woord ward Fleesch un keem middenmang de Minschen.

,,Drum mö' wi binanner kaomen, brukt den Boom, de Kripp, de Misse, Gottesdeenst,
de Gaven, de Plätzkes."
,,Dat is nich Wiehnachten, dat is, wo wi dat wennt bünt."
,,Nu is de Tied, wat Neiet tau maoken."
Tau de Tied güng een Paor dör dat Land...


Dat neiborn Kind, maolt van Karl Heyden (1845-1933), Ölge up Linnen

,,Is daor nich en Kind upstaohn?"
,,Bi weckern... bi u'se Naobersche is Fiete ankaomen."
,,Fein, 'n lütt Jung, heet de reell so of heet he Friedrich?"
,,Bi us in de Straote bünt een Wicht in't eerste Hus un een anner twei Daoge löter
tegenöver up de Welt kaomen. Dat hebb wi mit all Naobers fiert."
,,Hett de Fiete uk een Vadder?"
,,Denk woll, de Mauder is Mestersche. Heet anners un is in't Verwalten van
Krankenhus."
,,Hest em al seihn?"
,,Klaor, staotschen Kerl, stäbige Feute, de Mauder is gaud taufree."
,,'ne lüttke Familge."
,,Dat mö' wi fiern."
,,Vertelln, dat willt doch al weiten."
De Engels vermellen, de Schepers güngen kieken...

,,Könn wi vör Wiehnachten noch een Kilmerstuten bringen? Wannehr hebbt ih Tied?"
,,Sönndagmörgen, dat willt de lever as up'n Oabend, de hebbt ehrn Ünnerstand al
uprüümt, de teufd drub."
,,Kaom wi üm Klock elben binanner, midden an Dag bi ehr, dat freit mi."
,,Fein, bit denn."
,,Tschüß!"


Engel: Paul Klee

20.12.2022


na baven