Wat is nu? Ik ligg in't Bett un in miene Ohrn suust dat. "Vörbi!" — Wat passeert is, is passeert.
He is weg un ik heff keen Kraft mehr. "An't Krüüz mit em!", hefft se schreet.

Mien Blick fallt op miene Bibel. Ja, nu is dat seker, hier steiht dat: Christus is wohraftig operstahn. — Aver hüüt is Karfreedag — en gräsigen Dag. "An't  Krüüz mit em!"

Dat geiht nich in mien Kopp — doot — doch nich doot? Hüüt is Karfreedag — ik mutt na Golgatha! Jesus is bi to starven — un ik leev doch jümmers noch. Kann ik em villicht wat to drinken geven — em jichenswie helpen?

De Weg na Golgatha — so vele Lüü sünd hüüt ünnerwegens. De mehrsten wüllt an de Oostsee un sik poor scheune Daag maken. De Autobahn is bannig vull, meent dat Radio. Un all de Minschen hefft dat wichtig, sooo wichtig! — Wat hett dat eentlich op sik mit Oostern? De Oostereier, de köönt dat doch nich alleeen ween. Dat is keen Glück, dat is bloots Zucker för de Kinner. Ok de Fröhjohrssünn is dat nich alleen! Hüüt schient hill de Sünn von Heben, aver Oostern, dat is noch wat hen.

Keen will denn würklich na Golgatha hen? De Kinner, de ik fraag, de wüllt ehr Tant besöken. Un de groten Jungs wüllt to en Festival för Musik fohrn — wat ganz Besünners. De junge Deern, de geiht mit ehrn Fründ to Kark — 'ne seute bruunhoorige Deern! Een kann sehn, wo leev se den Jungen an ehr Siet hett.

Ik bün ok op'n Weg na de Kark. Dat is noch fröh — ik sett mi in'n Park op 'ne Bank. De Karktorm kiekt dröben twüschen Bööm, Sünn un Wulken na'n Heben rop. In all dat Grönen un Blöhn sitt ik hier ünnern Boom.

Mi kümmt en Leed in Kopp. Liesen sing ik, un de Truuer von gistern will mi bald afwörgen:

Kreuz auf Jesu Schulter, von der Welt verflucht, 
ward zum Baum des Lebens und trägt gute Frucht.
Kyrie Eleyson, sieh, wohin wir geh'n —
ruf uns aus den Toten, lass uns auferstehn.

Op Platt heet dat:

Krüüz op Jesu Schuller, för de Welt en Flöök,
warrt to'n Boom vun't Leven, de veel Früchten dräägt.
Kyrie eleison, kiek, 'neemhen wi gaht,
roop uns ut de Doden, dat wi operstaht!

De Boom över mi warrt op'nmaal to'n Krüüz. Is dat dor nich Jesus? Nee — is he nich ... Dor kümmt ganz breet de Sünn dörch de Wulken. En lütt Vagel singt liesen sien Fröhjohrsleed.

Nadenkern gah ik röver na de Kark. Karfreedag ...

Woso kann ik dat Vagelleed op eenmal verstahn?