Allens nieg!

Nadenken över de Johrslosung 2026 vun Marlou Lessing

Kiek, ik maak allens nieg!

Johrslosung 20206, Offenbarung 21

Nu is wedder Niegjohr, un de eersten goden Vörsätt sünd sachs al platzt. Sooo veel wulln wi nieg un anners maken! Sülvstoptimierung is ja dat Ideaal un ok de Flook vun uns Tied. "Vun morgen an warr ik...!" "In't niege Johr...!" Jedereen will perfekt warrn — dat perfekte Rezept för Unglück un Sülvstvörwürf. Wi weet dat — man liekers glöövt wi jümmers noch, dat Leven wöör eerst anfangen, wenn... "Wenn ik eerst düt un dat schafft heff, warr ik glücklich un frie ween!" In Wohrheit höllt düt Wenn uns fungen un fritt uns Leven op. Denn jümmers wedder sleit uns de Tied uns Pläne un Vörsätt ut de Hand. Wi sünd nienich good noog för uns sülven.

Bi Gott gifft dat keen so'n Bedingen, keen Wenn un Avers. He leevt uns ahn Bedingen, un in sien Ogen sünd wi al perfekt. Wenn wi uns Vörsätt fallnlaten mööt, wieldat wi to swack sünd, stöört dat Gott gornich. Wi dröfft unvullkamen blieven, denn sien Leevde to uns is ja vullkamen.

Wat avers tweigahn is — wat uns minschlich Gier un Verdreihtheit in de Welt un in uns sülvst tonicht un toschann maakt hett — dat kann un will Gott sülven wedder oprichten, denn he hett de Kraft dorto. He lett sien Vörsätt nich fallen, ok wenn wi to swack sünd. Dat Niege kümmt nich ut uns egen Knööv, sünnern vun Gott. Bloots in em is wohres Nieg-Warrn. Un wat he nieg maakt, dat warrt nienich mehr toschannen. Mit Gott tosamen köönt wi de niegen Schreed gahn. Uns Eer freedvuller un heiler maken, uns Twüschenminschlichkeit to uns Neegsten warmer un hartlicher, uns Alldag minner stressig un sinnvuller... Un wat Gott noch allens maken kann un will, köönt wi nich weten — avers wi köönt uns op frein.