Huul! Dat is keen Schann.

Vun Rudi Witzke

Gor nich kurioos is dat, dat dat vun uns ut de Johren 1939 bit 1947 so goot as keen Fotos gifft. Wenn ik mi vörstell, woans wi woll rümlopen sünd, den drept dat Bild baven dat ganz goot. Wenn di solk muulsche Bengels mit daaltrocken Flunsch in de Mööt kemen, denn wöörst allens mögliche glöven: Utneihte! Fohren Volk! Stratenbengels! "Gang" seggt man hüüt. Vertruun strahlen de nu nich ut. Aver wi sehgen so ut un weern frooh, wenn wi keen Kopp-un Klederlüüs harrn. Keen' Hunger un heile Knaken! Een dröge Eck to slapen. Uns Seelen weern so un so matsch. De müßten sik later nieg tosamenpappen un utrichten. Ganz ahn Schrammen un Ratschen hett dat woll keeneen henkregen.

Wenn een doch Biller ut de Tieden harr, denn weer dat beder, de nich to wiesen, — meist bit hüüt hen. Woso?
In den Groten Krieg vun 1939 bit 1945 sünd vele Kinner üm't Leven kamen, in de Bombenachten, up de Flucht un in de dösigen Scheiterien. Vele Kinner sünd so tweireten, dat een se nich wedderfinnen kunn. För vele Kinner weer keen Tiet, för se in de frorene Eerd en Graff to schüffeln. In de iesige Oostsee sünd se ünnergahn un versapen.

So an 50 Johr hebbt de düütschen Flüchtlinge un Bebombten vun ehr Noot un Pien vör alle Minschen, so se kunnen, still swegen. Jüm wöör ünnerschoven, dat se meinen dään, se harrn Ansprook, antoklagen, vun Leed un Unrecht to snacken un to klagen.
Natüürlich is dat richtig, dat dat Gruun in den Groten Krieg noch veel grulicher weer. Dat weit elkeen, de de gräsige Geschicht mit ehr Verbreken gegen de Minschen kennt. Auschwitz steiht bovenan. Un sää denn doch een vun de Flüchtlinge un Bebombten: "Ik denk ok an't Haff, an Hela, Dresden un Gomorrha in Hamburg un klaag!", denn wöör he as Antisemit afstempelt un beschimpt. Dull schellt! Denn dat kunn een Vergliek mit dat gröttst Verbreken, den Holocaust, sien. Un dat dörff bit hüüt nich sien.

Nu, in't Johr 2006 aver kannst Berichte in'n Kiekkasten vun Guido Knoop un annre seihn un Böker lesen, de ok vun Leed un Noot vun de Düütschen berichten. Anmarkt aver ward dorbi glieks: "ZDF-Intendant Markus Schächter lässt Guido Knoop weiter Narrenfreiheit." Wat bedüüdt hier "Narrenfreiheit"?

Aver: Nu harr en Mudder vun ehr Truur apen un ok vun Anklaag reden kunnt. Na 60 Johr! Aver levt överhaupt noch een? Wo? Verlaten un vergeten in en Pleegheim?

Nu gifft dat den "Verein Kriegskind e.V.", denn dat Gruun halt de Kinner vun domaals wedder in, engaal welk Spraak se snacken. Se warden hüüt dull krank un mütten Hülp hebben. Bedenk aver man maal: Dat sünd Mannslüüd un Fruunslüüd vun 60 bit 75 Johr! Egentlich veel to laat kümmt Upklären un Hülp, wo hüdigendags un in de vergahn Johren jümmer wedder Kriege in de Welt Noot un Doot över Kinner bringt un bröcht hebbt. Liekers gifft dat Lüüd, de de Arbeid vun den Vereen "Kriegskinder" scheif anseihn.

Bavenan steiht för alle Tieden dat gröötste Verbreken, de Holocaust. Elkeen weit üm dat unvörstellbore Verbreken an de Juden. In de Schoah sünd Millionen mautwillig un mit Vörsatt ümbröcht. De Nazis wullen dat ganze Volk vun de Juden utrotten. Elkeen vun uns weit, woans wi uns quäält vör Schaam över dat, wat wi een ganzes Volk andaan hebbt. Siet 50 Johren ward an jümmer anner Steden an dit Gruun dacht un Mahnmale inricht.

Ik fünn en Essay ut uns Daag vun Daniel Haw‚ "Die Heuchelei korrumpiert", "Reden und Taten: Die deutsch-jüdische Frage 2006"'. Dorto mutt ik wat seggen. He regt sik up, dat an de verfolgten, utplünnerten, mißbrukten un ümbröchten Minschen — to'n Deil — in för em to kuriose Wies erinnert ward.
Dor warden Stoltersteen in de Börgerstieg verlegt, hier un dor warden Gedenkstunnen afhollen, Mahntafeln anbröcht. Un mi wunnert, dat he seggt: Dor warden Schöler jümmer wedder piert mit de Tahlen un den Afloop vun de Schoah un weiten denn doch nix. —
Noch för een poor Johren weer dat Gegendeil an de Reig. Se smeten uns vör: In de Scholen seggt keeneen wat över de Schoah.
In't Radio, in'n Kiekkasten un in de Blädder ward jümmerto beschreven, wat dor Leges passeert weer. Un denn seggt he to dat allens: "Die Heuchelei korrumpiert." Dat verstah ik nich.
He meint: De Düütschen süfzen jümmer wedder: "Dat dörff nie wedder passeern!" Dat is aver ok allens. Un wat hebbt de Juden dorvun? "Nix!" Na de Fierstunnen, na de Leder, de villicht Kantors sungen hebbt, swiegen de Düütschen, lopen uteenanner un doon nix. Se hebbt wedder ehr Rauh. Blots de Juden nich. Vele vun de 100.000 Juden in Düütschland wöörn di, de du ehr Naver büst, to gern vun ehren Gloven, vun ehr Bruukdoom vertellen un di villicht sogoor mitmaken laten. Seggt he.

"Die Heuchelei korrumpiert." Dat ward över uns seggt. Dat kann doch nich bedüden: "Wi leigen hinnertücksch un verdarben?" Mien Wöörböker seggt dat aver so.
Ne, ganz so eenfach kann de jüüdsche Schriever Haw sik dat nich maken. Woher weit he, dat in dat Johr 2006 "nix!" twüschen Juden un Düütsche an Begegen is? Dat stimmt nich, wat he seggt. Un Leigen un Verdarben? Ne! Dat is nich goot. So wat to seggen. Dor kannst argerlich warden. Un noch argerlicher, wenn sik jümmer noch anner Juden upregen, dat unse düütschen Mudders üm ehr doden Kinner ut de Kriegstiet truurt un dat ok noch in Levenslööp upschreven hebbt un drucken löten. Un nu maakt dat ehr Kinner ok noch!

Üm elkeen Kind, dat dörch Gewalt üm't Leven kümmt, willn un warden wi truurn. Dorför warden wi uns insetten, dat dat jümmer weniger nöödig is. Un ik wehr mi gegen "Leigen un Verdarben" orrer wat dat heit. Villicht bün ik denn een Rassist orrer Antisemit? Wat Herr Daniel Haw mit dat maal verklickern kunn?

Ik will dat mit unsen ersten Bundespräsidenten hollen, de seggt hett: Dat Avendland is up drei Bargen gründt, up Roms Barg mit dat Recht, up Athens Barg mit de Philosophie un up Jerusalems Barg Moriah mit unsen un de Juden ehren Gloven.

Un up den Barg Moriah warden wi gahn to't Gericht, as dat in dat Book bi Jesaja in't 2. Kapittel schreven steiht. Dat willn wi un schall Herr Haw un de Juden man öftins lesen. Un maal warden wi losgahn. Wiß warden denn Juden un Christen in lieke Wies vör Gott bestahn orrer nicht. Dor is Gott sien Woort güllig.

Links:

• Juden in Deutschland — Fragen 2006: Die Heuchelei korrumpiert. Erster Teil des Essays "Reden und Taten: Die deutsch-jüdische Frage 2006" von Daniel Haw
• Charta vun de Heimatverdrevenen
• Kriegskind e.V.
• Dat Book Jesaja