De Grönauer Kapell. Teknen vun Jürgen Hagen

Bööm

Andacht in Grönau, hollen an'n 3.8.2008 vun Pastor i. R. Henning Tappe


Du grote Gott, dörch Jesus — uns leve Vadder!
Du hest de Sünn wedder upgahn laten över uns.
Laat dat ok hell warrn in uns Harten, wenn wi nu dien Wort höört un di mit uns Leder un Gebeet priesen.
Schenk uns den Globen, dat du bi uns büst alle Daag bet an dat End vun disse Welt. Amen.

Loff un Ehr wees Gott, unsen Herrn Jesus Christus sienen Vadder! He hett in sien groot Erbarmen nie Minschen ut uns maakt. He hett uns lebennig Höpen schenkt dörch dat Uperstahn vun Jesus Christus vun de Doden.


Leve Gemeende!

Roeckstraat. Foto: Anke Nissen
Roeckstraat. Foto: Anke Nissen

In de Roeckstraat in Lübeck steiht en wunnerschöön Lindenallee. Nu warrt de Bööm olt. 1869 sind se wohl plant worrn, vör nu bald 140 Johr. Vun disse Tiet an warrt disse Straat na Meckelborg "Roeckstraat" nöömt.

De Boomdoktor hett en Diagnose stellt: "Doodkrank! Een vun de Bööm is doodkrank, de mutt weg. Gefohr!!"

Twee Daag later weer nix mehr vun em to sehn.
Dree Daag later leeg up den Stubben en groot witt Papier. Dor weer vun Kinnerhand up schreven: "Warum habt ihr das getan? Wir haben unseren Baum doch so lieb gehabt!"

Boomstumpf. Foto: Sassi / Pixelio
Boomstumpf. Foto: Sassi / Pixelio

Weern dat nu Kinner orrer de Öllern? Egal! Se hebbt en Weten dorvun, dat Bööm för uns verpestet Luft groot Bedüden hebbt.

In de letzt Tiet sind Bööm wedder "in", as man hüüt seggt. In de "Lübecker Narichten" warrt veel dorvun schreven. Lübeck prahlt mit sienen Boombestand, kann dat wohl ok! Ik erinner mi noch goot an de Johren, wo vele ole Alleen to Schand maakt worrn sünd. De Autos hebbt Vörfohrt! Dat weer de Parole. Weg mit de Bööm! Schatten för Peer und Kutscher bruukt wi nich mehr!
Nu freu ik mi över disse nie Wendung bi uns. De Bööm sünd wedder "in".

Roeckstraat. Foto: Anke Nissen
Roeckstraat. Foto: Anke Nissen

Man up uns schöne Eerd süht dat ok noch anners ut. De Urwald warrt roodt up Düvel kaam herut — un de is al dor. Versteppung und Wööst breedt sik ut!

Aver dat is hüüt nich mien Thema. Goot, de Bööm sünd — so as dat fröher ok eenmal weer — wedder Sinnbild för dat Leven worrn. Wenn de Boom wassen deit, denn gifft dat Höpen för de Minschen, man wenn he krank warrt, denn süht de Tokunft för de Minschen swatt ut, so warrt seggt. Dat mutt sik wiesen. De Boom as Levensboom? Is dat so, wo wi doch sünst so modern denken, upkloort Minschen sünd?

Freedpark Curau. Foto: Rudi Witzke
Freedpark Curau. Foto: Rudi Witzke
Freedwoold. Foto: Wikimedia Commons
Freedwoold. Foto: Wikimedia Commons

Wat denkt sik de Angehörigen, wenn se ehren leven Doden ünner enen Boom to Graff bringt? Leven? Ja, wenn de Bööm ehre gröne Pracht wiest, denn mag dat angahn. Man winterdags, kahl un gries, denn kann ik nich an't Leven denken, denn krüppt dat kolt in mi hoch, dat ik mi schütteln mutt. Kann en Boom mi trösten? Kann he verstahn, wat mi bedrückt? Kann he Mitgeföhl hebben? Bruukt de Minsch, de dalstuukt is, nich minschlich Tospruch? En Wort vun enen, de de Laag vun sien Gegenöver kennt?

Bökenwoold. Foto: farblos / Pixelio
Bökenwoold. Foto: farblos / Pixelio

Bööm as Schicksal, dor kann ik nich an glöven. Bööm höört so as wi to Gott sien Schöpfung un sünd — dat mutt ik togeven — sien gröttsten un ok mit de schöönsten Exemplare.

In de 2. Schöpfungsgeschicht heet dat:

"Gott de Herr leet upwassen ut dat Eerdriek luter Bööm, smuck antokieken und goot to eten. De Boom, de Leven gifft, de weer merrn in'n Goorn."

Also: Vun Anfang an keen Goorn ahn Bööm. Und noch bito de Levensboom. Leven, dat is Gott sien Geschäft! De Levensboom is för alle dor.

Boom an'n Beek. Foto: Rainer Sturm / Pixelio
Boom an'n Beek. Foto: Rainer Sturm / Pixelio

De Beter vun Psalm 1 seggt uns, wo dat Leven to finnen is. Up kenen Fall dörch en schicksalhaft Verbinnen mit enen Boom, de ja ok blots en vun Gott in en Plant verwannelt Gedanke is. In den Psalm heet dat:

"De Minsch sitt an den Born vun't Leven, de up Gott sien Woort hören und sien Hart doran fastmaken deit. So'n Minsch is liek as en Boom, de plant is an'n Beek vull Water und de sien Frucht bringen deit, wenn dat so wiet is."

Und dat schüllt wi nich överlesen: "Sien Bläder de verdröögt nich!" Dat gifft dat bi unse Bööm, so old as se ok warrn, nich! Hett de Beter vun den 1.Psalm schon en Ahnung vun en ewig Leven hatt? Hier snackt he ja wohl vun enen Levensboom, mit den he den Minschen verglieken deit, de sien Vertruun up Gott sett. Ja, noch mehr. Ik glööv, de Psalmbeter meent, dat so een in Gott sien Wort gründt Minsch ok anner Lüüd to'n Leven verhölpen kann, em Tospruch un Schutz geven kann.

Thriumphkrüüz Bad Doberan. Bild: Wikimedia Commons
Thriumphkrüüz Bad Doberan. Bild: Wikimedia Commons

Ik freu mi över jedeen schönen Boom, man mien Höpen kann ik nich an sien Telgen hangen orrer an siene Wörteln inbuddeln. Mien Höpen up en Tokunft un en Leven, dat mi in Gott sien Riek leven lett, dat hangt an't Krüütz vun Jesus. Gott hett uns en lebennig Höpen schenkt dörch dat Uperstahn vun Jesus vun de Doden. Dat is mien Trost in't Leven und bi't Starven!

Ik heff mal en Krüüz sehn, dat vun gröne Bläder ümrankt weer. Ik meen, dat weer in Bad Doberan, in de ole gotisch Klosterkark. Dat sehg gor nich mehr na en Schandholt ut, nee, wat dor gröön utslagen weer, dat wiest up en nie Leven hen. Jesu Krüüzholt as Levensboom.

En fein Bild för dat Höpen, dat uns mit Christus verbinnen deit.

Amen


7.9.2008


na baven