De Grönauer Kapell. Teknen vun Jürgen Hagen

Dörch den "Lütten Katechismus" to'n Gloven kamen

Andacht vun Henning Eggers


In de Tied, as Dr. Martin Luther lewen de, geev dat de Bibel, de meist in Latiensch orrer Griechisch schrewen wär. För dat gemeene Volk wär dor nix to lesen, sünnern se kunnen bloots an Sünndag in de Kark de opschrewen Texte vun de Kanzel hörn. Luther hett se, as wi dat weten doot, jo in de hoochdüütsche Spraak översett, aver wer kunn denn lesen vun de Lüüd?! Dat kunnen dormalen bloots studeerte Minschen! Schölers in Klöster orrer Studiosi an de Universitäten kregen Ünnerricht un kunnen somit de biblischen Texte ut dat ole un niege Testament un ok de Psalmen nahlesen un verkloort kriegen.


En fixen Keerl: Dokter Martin Luther

Dor keem wedder Dr. Martin Luther in't Speel! 1529 müss Luther op landsherrlich Geheiß en Visitatschoon in Kursachsen dörchföhren. He markt, dor liggt wat in Argen; düsse plietsche un hoochgeistige Minsch hett dat mitkregen, dat in de Hüüs vun de Minschen wenig mit den Gloven antofangen weer. So käm sien Besluss — he dörchforst de Bibel un all de wichtigen Sooken, so as dat Morgenbeden, dat Dischbeden, dat Avend- un Nachtbeden, dat Vadderunser, de teihn Geboote, dat Döpen, dat Avendmahl un wat sünst noch wichtig weer; dat allens faat he tohoop un schrew dat op un hett somit de "Bibel in lütt", nämlich den Katechismus drucken looten. Dat weer de Quintessenz vun de christlichen Lehren. (Dat Woort "Katechismus" heet in etwa "Lehre" un hett ok wiedlöftig mit dat Katheder, dat Lehrpult, to doon.)

So käm de christliche Gloven in de Hüüs vun de Lüüd! De Öllern kunnen nu ehre Kinner christlich optrecken. Luthers Fru Katharina von Bora hett eenmol seggt, "Martin hett in düssen "Lütten Katechismus" allens Notwendige tohoopfaat, so dat nu de Minschen in düt lütt Book de Hauptsook ut de Bibel in de Künn kriegen kunnen."

De König vun Hannover hett per Gesetz 1862 för Scholen un Karken den Druck vun den "Lütten Katechismus" nie opleggen laten un dat Verdeelen veranlasst. So keem denn an 10. November 1863 to'n 500. Gebordsdag vun Martin Luther wedder en Katechismus in de christliche Welt.

Ok in den Afloop vun uns 20. Johrhunnert wöörn in Neddersassen Katechismen besünners an Grundschoolen un Gymnasien verdeelt. 1983 hebbt sik veele Schöölers, Lehrers un Pasters meldt mit positive Breefe. So schrifft een Klass: "Wi hebbt dat Vörwoort vun den Katechismus dörchleest, un wi sünd de Meenung, dat se de Minschen mit düssen Bibelextrakt ene grote Freud moken doot. Dat wiest uns, dat wi in de Christenheit doch noch veel an Gott, sien Söhn un den Hilligen Geist gloven doot. Martin Luther hett sik domols so veel Mööch mookt, dorum wüllt wi nu mehr weten över em un uns Gloven! Klasse 4c"

So un ähnlich keem dat ut Lannen vun Schoolen, Universitäten un de Karken. "Gott den Herrn wees Dank, he schenkt uns dat Gedeihen un sienen Segen un erweckt so veele Minschen vun ehren geistigen Dood, so dat se nu wedder to den wohren, lebennigen, christlichen Gloven findt!"

"Gott sien Woort un Luthers Lehr vergeet wi nu un nimmermehr!"

Amen.


29.4.2018


na baven